ზუგდიდში, რიგის ქუჩის მოსახლეობა წყალსაწრეტი არხის არქონის გამო პრობლემებზე საუბრობს. ადგილობრივები ამბობენ, რომ ქუჩის სანიაღვრე არხი სანახევროდ გაკეთდა და ნაწილი მოსახლეობის დაზარალდა. წვიმის დროს აქ ეზოებში წყალი შედის და ქუჩა ირეცხება. ასევე საშიშია საკანალიზაციო ჭა, რომელსაც ხუფი არა აქვს და მოსახლეობას საფრთხეს უქმნის. გარდა სანიაღვრე არხისა, მოსახლეობა ამბობს, რომ საკანალიზაციო სისტემაც მოუწესრიგებელია , წვიმიან ამინდში ფეკალური მასები გადმოდის და ჭებში ჩაედინება.
ადგილობრივების თქმით, მერიას რამდენჯერმე მიმართეს, თუმცა უშედეგოდ. მერიაში ამბობენ, რომ ზუგდიდში ლომოურისა და რიგის ქუჩებზე ღია და დახურული ტიპის სანიაღვრე წყალსაწრეტი სისტემის მოწყობის ღირებულება 56156 ლარს შეადგენს.ტენდერში გამარჯვებული კომპანია „ევრომშენის“ წარმომადგენელი აცხადებს, რომ პროექტში, რომელზეც მერიამ ტენდერი გამოაცხადა, რიგის ქუჩის პრობლემური მონაკვეთი არ შედის.რაც შეეხება მერიას, უწყებაში აცხადებენ, რომ პრობლემა მათთვის ცნობილია და დანარჩენი სამუშაოების განხორციელება ეტაპობრივად მოხდება.
