4 ოქტომბერს ჰოლანდიის ქალაქ ტილბურგში შედგება პრეზიდენტ მიხეილ სააკაშვილის შეხვედრა ევროპის სტუდენტ-იურისტთა ასოციაციის წევრებთან.
შეხვედრის ორგანიზატორია აკადემიური ფორუმი და ELSA Tilburg, რომელმაც პრეზიდენტი მიიწვია, როგორც რეფორმატორული მოძრაობისა და დემოკრატიის ვარსკვლავი.
როგორც საინფორმაციო ბუკლეტშია ნათქვამი, საქართველოს ყოფილი პრეზიდენტი და შემდგომში ცნობილი უკრაინელი პოლიტიკოსი მიხეილ სააკაშვილი არის თანამედროვე დემოკრატიის ხატი და უჭიერესი ორატორი აღმოსავლეთ ევროპაში, ადამიანი, რომელმაც 2003 წელს ასი ათასობით ადამიანი გამოიყვანა ქუჩებში კორუმპირებული ელიტის წინააღმდეგ, მოახდინა ,,ვარდების რევოლუცია'' და ხელისუფლებაში ხმათა უდიდესი უმრავლესობით მოსვლის შემდეგ განახორციელა ძირფესვიანი რეფორმები ქვეყანაში. გარკვეული ხნის შემდეგ იგი უკრაინელი პოლიტიკოსი გახდა და ოდესის გუბერნატორის პოსტზე დაუნდობელი ბრძოლა გამოუცხადა კორუფციას ხელისუფლების უმაღლეს ეშელონებში. სამწუხაროდ, მას არ დააცალეს ხალხის უმრავლესობის გადამწყვეტი მხარდაჭერის მოპოვება – იძულებით დაატოვებინეს უკრაინა და მოქალაქეობის არქონის გამო თავშესაფარი ნიდერლანდებში ჰპოვა, როგორც ჰოლანდიელი ქალის მეუღლემ.
4 ოქტომბერს იგი აკადემიური ფორუმისა და ,,ელსა ტილბერგის'' სტუმარი იქნება ტრადიციულ ,,ღამის საუბრებში.''- წერენ შეხვედრის რგანიზატორები საინფორმაციო ბუკლეტში.
ცნობისათვის:
,,ელსა ტილბურგი'' არის ნაწილი ევროპის სტუდენტ-იურისტთა ასოციაციისა ELSA, რომელიც დაარსდა 1981 წლის 4 მაისს, ვენაში, ,,რკინის ფარდის'' ორივე მხარეს არსებული სასწავლებლების სტუდენტებისა და პროფესორ-მასწავლებლების ინიციატივით.. მასში გაერთიანებულია 43 ქვეყნის 300 უმაღლესი სასწავლებლის სამართლის ფაკულტეტის 42 000 სტუდენტი, ამ მაჩვენებლით ეს ორგანიზაცია ყველაზე დიდი დამოუკიდებელი სამართლის სტუდენტთა კვლევითი ასოციაციაა მსოფლიოში.
ასოციაციის ძირითადი მიზანია ურთიერთგაგების ხელშეწყობა და საერთაშორისო კონტაქტების დამყარება.
.