ბარსელონაში გუშინდელ საპროტესტო აქციაზე მომხდარი შეტაკებების შედეგად პოლიციის 30-მდე თანამშრომელი დაშავდა.
Mossos d'Esquadra -ს ინფორმაციით, 20-მა პოლიციელმა დაზიანებები კატალონიის პარლამენტის შენობასთან, დანარჩენებმა კი, ბარსელონას პოლიციის მთავარ სამმართველოსთან მიიღეს.
საპროტესტო აქციების არც ერთი მონაწილე დაკავებული არ არის.
შეგახსენებთ, რომ გუშინ კატალონიის რამდენიმე ქალაქში, მათ შორის ბარსელონაში საპროტესტო აქციები გაიმართა, რომლებიც 2017 წლის 1 ოქტომბერს ჩატარებული რეფერენდუმის წლისთავს მიეძღვნა. საპროტესტო აქციებში რეგიონის ესპანეთის შემადგენლობიდან გასვლის მომხრეები მონაწილეობდნენ. ბარსელონაში გამართულ დემონსტრაციაში მონაწილეობა 180-მა ათასმა ადამიანმა მიიღო.
დემონსტრაცია კატალონიის პარლამენტის შენობასთან დასრულდა, სადაც მომიტინგეებმა პოლიციური კორდონის გარღვევა შეძლეს, რის გამოც პოლიციელთა ნაწილმა თავი შენობას შეაფარა, შემდეგ კი მომიტინგეთა წინააღმდეგ ცრემლსადენი გაზი გამოიყენა.
