სკანდალი ჯანდაცვის სამინისტროში – ლუგარის ლაბორატორიის შესახებ ჯანდაცვის მინისტრისა და აშშ-ს საელჩოს მიმოწერისა და დოკუმენტაციის რუსეთში მოხვედრას, საპარლამენტო უმრავლესობის წევრები აფასებენ. „ქართულ ოცნებაში“ აცხადებენ, რომ ინფორმაციის გაჟონვა მსოფლიო დონის პრობლემაა.
„სისულელეა ის რომ ლუგარის ლაბორატორია რაიმე ცუდს აკეთებდეს. რაც შეეხება ინფორმაციის დაცულობა, საგანგებო საიდუმლო ინფორმაციებს ვერ იცავენ ხშირ შემთხვევაში“-ამბობს გიორგი ვოლსკი.
ოპოზიცია არ გამორიცხავს, რომ საქართველოს ჯანდაცვის მინისტრისა და ამერიკის საელჩოს მიმოწერა მოსკოვში ქართული სპეცსამსახურების დახმარებით მოხვდა.
„ჩვენი სპეცსამსახურები და თავდაცვის სამინისტრო თვითონ, ნებაყოფლობით აძლევენ რუსეთს ისეთ ინფორმაციას, მაგალითად როგორიცაა თბილისის თავდაცვის ზღუდეები. რუსეთს გახსნილი აქვს კარები ყველანაირი ინფორმაციის მოსაპოვებლად საქართველოს ნებისმიერ სტრუქტურაში“-აცხადებს „ნაციონალური მოძრაობის“ ერთ-ერთი ლიდერი გია ბარამიძე.
„ევროპულ საქართველოში“ კი იმედოვნებენ რომ ინფორმაციის გაჟონვა შიდასტრუქტურულ არეულობასთანაა კავშირში. ირაკლი კიკნაველიძის თქმით, ხელისუფლებას უნდა ესმოდეს, რომ რუსულ პროპაგანდას არ უნდა უწყობდნენ ხელს. თუმცა ბოლოს განვითარებული მოვლენები სხვა რამეზე მეტყველებს .„ამბების თანმიმდევრობა გვეუბნება იმას, რომ ეს გამიზნული ქმედებაც კი შეიძლება იყოს“-ამბობს იგი
წერილები თბილისში რიჩარდ ლუგარის სახელობის ლაბორატორიის საქმიანობას ეხებოდა. სწორედ მათზე დაყრდნობით კრემლთან დაახლოებულმა მედიამ ხმაურიანი სათაურით სტატია გამოაქვეყნა, სადაც მთავარი აქცენტი ბიოლოგიური იარაღის შექმნის მასშტაბურ საფრთხეზე გაკეთდა..