საქართველოს პრემიერ-მინისტრ მამუკა ბახტაძესა და აშშ-ს სახელმწიფო მდივან მაიკ პომპეოს შორის გამართულ შეხვედრას სახელმწიფო დეპარტამენტი განცხადებით გამოეხმაურა. სპეციალურ ბრიფინგზე პრესსპიკერმა ჰიზერ ნოიერტმა ის საკითხები შეაჯამა, რომელიც შეხვედრის დროს მნიშვნელოვანი იყო. მან საქართველოს ტერიტორიული მთლიანობის მიმართ აშშ-ის მხარდაჭერა კიდევ ერთხელ დაადასტურა. „სახელმწიფო მდივანი მაიკლ პომპეო შეხვდა საქართველოს პრემიერ-მინისტრს და შეერთებულ შტატებსა და საქართველოს შორის არსებული მტკიცე ურთიერთობები კიდევ ერთხელ დაუდასტურა. ათი წლის წინ რუსეთი თავს დაესხა საქართველოს და აგრძელებს მისი რეგიონების – აფხაზეთისა და სამხრეთ ოსეთის – ოკუპაციას. მიუხედავად რუსეთის მიერ ქვეყნის ტერიტორიის 20 პროცენტის მიმდინარე ოკუპაციისა, საქართველო განაგრძობს დემოკრატიული ინსტიტუტების რეფორმას და ეკონომიკის განვითარებას. “შეერთებული შტატები საქართველოს გვერდით დგას. ამერიკელი და ქართველი ჯარისკაცები გვერდიგვერდ იბრძვიან ავღანეთში. ჩვენ მოუთმენლად ველით იმ დღეს, როდესაც საქართველოს ნატოში ვიხილავთ. „შეერთებული შტატები აგრძელებს საქართველოს სუვერენიტეტის, დამოუკიდებლობისა და ტერიტორიული მთლიანობის მხარდაჭერას. და გააგრძელებს მის ძალისხმევის ხელშეწყობას სამართლის უზენაესობისა და ანგარიშვალდებული მმართველობის გასაძლიერებლად,”-განაცხადა ჰიზერ ნოიერტმა.