ზუგდიდის მუნიციპალიტეტის სოფელ ჯიხაშკარში გზის მოთხოვნით საპროტესტო აქცია გაიმართა. ადგილობრივებმა ცენტრალური გზა გადაკეტეს. თუმცა სამართალდამცავებმა მათ ამის საშუალება არ მისცეს. ურთიერთშელაპარაკება და დაპირისპირება გამოიწვია ადგილობრივი ხელისუფლების წარმომადგენლების გამოჩენამ.
ჯიხაშკარელები საზარანდიოს უბანში 6 კილომეტრიანი მონაკვეთის აღდგენასა და მოსაცდელის გაკეთებას ითხოვენ. „ წლებია ასე ვართ, გზა არ გვაქვს, ერთს რომ გაწვიმდება, მუხლამდე წყალი და ტალახი დგება, მანქანა ვერ გადის, ფეხით ვერ გავდივართ, ბავშვები სკოლაში ვერ მიდიან, ხომ უნდა მოგვაქციონ ყურადღება? მარტო არჩევნების დროს ვახსენდებით.“- უთხრა „ოდიშინიუსს“ აქციის ერთ-ერთმა მონაწილემ.
ადგილობრივების თქმით, აქციის მსვლელობისას მათთან ხელისუფლების წარმომადგენლები მივიდნენ და პრობლემის მოგვარებას დაპირდნენ, თუმცა მოსახლეობა ამბობს, რომ ესეც ისეთივე ტყუილი დაპირებაა, როგორც სხვა დანარჩენი. ისინი ხელისუფლებას უყურადღებობაში ადანაშაულებენ.