ზუგდიდის ყოფილი ვიცე-მერი სახელმწიფო უსაფრთხოების სამსახურში მივიდა. . გამოძიებას კითხვები გია გულორდავასთან, "კურიერის" მიერ გავრცელებულ აუდიო ჩანაწერთან დაკავშირებით აქვს. ყოფილი ვიცემერი უწყებაში ადვოკატის გარეშე მივიდა

 

 

გია გულორდავამ უწყებაში შესვლამდე ჟურნალისტებთან საუბარში ქრთამის აღება უარყო და განაცხადა, რომ არ იცის რაზეა საუბარი გუშინ გავრცელებულ ჩანაწერში. ყოფილი ვიცე მერი ასევე უარყოფს, რომ ბიზნესმენმა კვირკვიამ თანხა შესთავაზა, თუმცა ადასტურებს, რომ 3-4 თვის წინ მას შეხვდა. 

 

გულორდავას თქმით, კვირკვიას ტერიტორიების გადაცემა იჯარით უნდოდა, რაზეც მერიამ უარი განუცხადა და განუმარტა, რომ გამოცხადდებოდა აუქციონი, რომელშიც მიიღებდა მონაწილეობას.

 

ზუგდიდის ყოფილმა ვიცე-მერმა თანამდებობის დატოვების შესახებაც გააკეთა კომენტარი. გია გულორდავას თქმით, ამის შესახებ გადაწყვეტილება იმიტომ მიიღო, რომ გამოძიებას ხელი არ შეშლოდა და ასევე ოპოზიციის მხრიდან სპეკულაციები არ გაჟღერებულიყო

 

.შეგახსენებთ, საქმე ეხება შესაძლო კორუფციულ გარიგებას. საუბრიდან, რომელიც ფარულად არის ჩაწერილი, ირკვევა, რომ რუსეთში მოღვაწე ქართველმა ბიზნესმენმა აუქციონში გამარჯვების სანაცვლოდ, წინასწარ ზუგდიდის მერს და მის მოადგილეს ქრთამი მისცა, თუმცა პირობა დაირღვა და ზურაბ კვირკვიას სასურველი ტერიტორიები არ გადასცეს.

 

 

წყარო www.rustavi2.ge