9 სექტემბრიდან ავტოკატასტროფაში დაღუპული აფხაზეთის დე ფაქტო პრემიერ – მინისტრის გენადი გაგულიას მოვალეობას დროებით მისი მოადგილე დაურ არშბა ასრულებს – წერს აფხაზური მედია.
ახალი პრემიერ- მინისტრი ერთი თვის განმავლობაში დაინიშნება, ხოლო სამი თავის განმავლობაში, მინისტრთა კაბინეტის ახალი შემადგენლობა დასახელდება.
აფხაზეთის დე ფაქტო რესპუბლიკის პრემიერ-მინისტრი გენადი გაგულია 8 სექტემბერს, ფსოუ-სოხუმის გზის მონაკვეთზე მომხდარი ავტოსაგზაო შემთხვევის დროს დაიღუპა. შემთხვევა მაშინ მოხდა, როდესაც სირიიდან დაბრუნებული გაგულია, აფხაზურ დელეგაციასთან ერთად, სოჭის აეროპორტიდან სოხუმისკენ მიემართებოდა. ამავე ცნობით, ის სამთავრობო კორტეჟის თანხლებით გადაადგილდებოდა.
აფხაზურ მედიასა და სოციალურ ქსელებში უკვე ჟონავს პრემიერის დაღუპვის გარემოებათა ოფიციალური ვერსიისგან განსხვავებული ეჭვები – გამომდინარე იქიდან, რომ ოპოზიცია აფხაზეთში სულ უფრო მწვავედ გამოდის ხაჯიმბას კრიტიკით, არ არის გამორიცხული, რომ გაგულია ოპოზიციურ ბანაკს შეერთებოდა, ეს კი, თუ მხედველობაში მივიღებთ, რომ სულ ახალახან გადადგა ვიცეპრეზიდენტიც, ვიტალი გაბნიაც, რომელმაც ხაჯიმბას ,,მეგობრულად'' ურჩია არ იყაროს კენჭი მომავალ არჩევნებში, გაართულებდა ხაჯიმბას მდგომარეობას. ეჭვს აძლიერებს ის, რომ ავტოსაგზაო შემთხვევა მოხდა იქ, სადაც არც თუ ისე ავარიასაშიში ტერიტორია იყო.
გაგულია უფრო სამეურნეო მუსაკი იყო, ვიდრე პოლიტიკის განმსაზღვრელი ფიგურა, მაგრამ პრემიერის გადადგომა ვიცე-პრეზიდენტის შემდეგ აშკარად გააძლიერებდა ოპოზიციას, ამიტომ არაფერია გამორიცხული, კერძოდ ის, რომ ავარია ხელოვნურად იყო მოწყობილი – წერენ სოციალურ ქსელებში