ფოთში ხელყუმბარის აფეთქების შედეგად დაშავებული 16 წლის მოზარდი კვლავ რეანიმაციულ განყოფილებაში რჩება. მას გუშინ ქუთაისის ინტერვენციული მედიცინის ცენტრში ნეიროქირურგიული ოპერაცია ჩაუტარდა.
მოზარდს ქალა-ტვინის დაზიანება ჰქონდა. კლინიკის პრესსამსახურის ინფორმაციით, მოზარდის სიცოცხლეს საფრთხე არ ემუქრებდა, ის რეანიმაციულ განყოფილებაშია მოთავსებული და შესაბამის მკრუნალობას გადის.
რაც შეეხება ზუგდიდის საავადმყოფოში ფოთიდან შემოყვანილი პაციენტის მდგომარეობას, იგი კვლავ მძიმეა. ის მართვით სუნთქვაზე იმყოფება. საავადმყოფოს სამედიცინო მენეჯერის სულხან ორჟონიას თქმით, მამაკაცს სამი ოპერაცია ჩაუტარდა.
„რჩება უმძიმეს მდგომარეობაში. ჩაუტარდა ტრეპანაცია თავის ტვინზე და ჰემატომის ევაკუაცია. ასევე ოპერაცია გულმკერდის არეში. მარჯვენა ზედა კიდურზე ჩაუტარდა ამპუტაცია წინა მხრის დონეზე“, – აღნიშნა მან.
ფოთში, გუშინ ასაფეთქებელი მოწყობილობის აფეთქების შედეგად გარდაიცვალა 1 და დაშავდა სამი ადამიანი. საუბარია 33 წლის, 16 წლის, 29 წლის და 42 წლის მამაკაცებზე. ეს უკანასკნელი გარდაიცვალა.
როგორც შსს-ში აცხადებენ, ს, სისხლის სამართლის საქმე ორი – 236-ე და 124-ე მუხლებით აღიძრა. 236-ე მუხლი გულისხმობს ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას, 124-ე მუხლი კი, ჯანმრთელობის დაზიანებას გაუფრთხილებლობით.