ქუთაისში გაერთიანებულ ოპოზიციას "ძალა ერთობაშია" "ქართული ოცნების", "ევროპული საქართველოს" და სხვა პარტიის 50 – მდე წარმომადგენელი შეუერთდა. — ამის შესახებ გაერთიანების წევრებმა ქუთაისში გამართულ ბრიფინზე განაცხადეს. მათი თქმით, გაერთიანებული ოპოზიცია არის ერთადერთი ძალა, რომელიც ხელისუფლებას შეცვლის.
"დაიწყო პატრიოტების გაერთიანება, რომელთაც ყელში ამოუვიდა მუდმივი ანგარიშსწორება და წინა ხელისუფლების ლანძღვა, მაშინ, როდესაც ქვეყანაში უმოქმედობაა, ისინი გვიერთდებიან არა ფინანსური ინტერესის გამო, არამედ იმიტომ, რომ სურთ ქვეყნის განვითარება", – განაცხადა გრიგოლ ვაშაძემ.
გაერთიანებას შეუერთდა "ქართული ოცნების" ოზურგეთის საოლქო ორგანიზაციის წარმომადგენელი ცირა ჯინჭარაძე. მისი განცხადებით, პარტიიდან წასვლის მიზეზი სხვადასხვა პოლიტიკური შეხედულება გახდა. მისი თქმით, მხარს უჭერს გრიგოლ ვაშაძეს, რადგან როგორც ბევრ მოქალაქეს "ქართულმა ოცნებამ" მასაც იმედი გაუცრუა.
პრეზიდენტობის კანდიდატმა გრიგოლ ვაშაძემ მხარდამჭერებს მადლობა გადაუხადა და განაცხადა, რომ დღეს უმოქმედობის დრო არ არის, რადგან ქვეყნის წინაშე დგას დიდი გამოწვევა.