ევროპარლამენტარების მიერ მომზადებულ კრიტიკულ ანგარიშში საქართველოს კორუფციის მაჩვენებელიც მოხვდა.
დოკუმენტში, რომელიც ანდრეს მამიკინსმა მოამზადა, საუბარია ანტიკორუფციული სააგენტოს უსაფრთხოების სამსახურიდან გამოყოფის საკითხზე.
დოკუმენტში წერია, რომ კორუფცია საქართველოსთვის ერთ-ერთ მთავარ გამოწვევად რჩება, რისთვისაც საქართველოს ხელისუფლებამ ამ მიმართულებით აქტიური ნაბიჯები უნდა გადადგას.
არანაკლებ კრიტიკული იყო დამოუკიდებელი ექსპერტების დასკვნაც, სადაც სხვადასხვა საკითხთან ერთად, არაერთხელ იყო ნახსენები ბიძინა ივანიშვილი, როგორც არაფორმალური მმართველი.
ევროპარლამენტის უმკაცრეს კრიტიკას ოპოზიცია "ხელისუფლებისთვის საგანგაშო სიგნალს" უწოდებს.
ოპონენტები მოუწოდებენ მთავრობას, ზუსტად შეასრულოს ის ვალდებულებები, რაც ევროკავშირთან აქვს, წინააღმდეგ შემთხვევაში, შედეგები გაცილებით უარყოფითი იქნება.
არაფორმალური მმართველობა, ბრძოლა პრეზიდენტის წინააღმდეგ, კრიზისი სასამართლოში, შერჩევითი სამართალი, შტურმი კრიტიკულ მედიაზე და თბილისის ცენტრიდან გატაცებული ჟურნალისტის ამბავი – ეს არის ის, რაც საქართველოს ხელისუფლებას გუშინ ევროპარლამენტში შეახსენეს და ამის გამო ქვეყნის მთავრობა გააკრიტიკეს.
მიუხედავად ამისა, უმრავლესობაში ეს კრიტიკა არაფრად მიაჩნიათ და ამბობენ, რომ ცალკეული დეპუტატების შეფასება მთლიან სურათს ვერ შეცვლის.