საქართველოს ხუთმა მოქალაქემ, იტალიის შს მინისტრისა და ვიცე პრემიერის მატეო სალვინის მშობლების სახლი გაქურდა. ამის შესახებ ინფორმაციას იტალიური პრესა ავრცელებს. მედიის ცნობით საქართველოს ხუთმა მოქალაქემ აგვისტოში მილანში რამდენიმე ბინა გაქურდა, რომელთა შორის ერთ-ერთი მინისტრის მშობლების კუთვნილი ბინაა.
ეჭვმიტანილი ქართველები პოლიციამ 27 აგვისტოს, იმ დროს დააკავა, როდესაც ისინი მილანის დატოვებას გეგმავდნენ. ნაპოვნია მოპარული ნივთების ნაწილი. უმეტესობა კი პოლიციის ვარაუდით, იტალიიდან უკვე გატანილია.
იტალიელი სამართალდამცველები აღნიშნავენ, რომ დაკავებულები პროფესიონალები და დანაშაულებრივი ჯგუფის წევრები არიან.
იტალიის შს მინისტრის მშობლების სახლი 15 აგვისტოს გაქურდეს. ბინიდან გატანილი იყო სეიფი. იმავე შენობაში კიდევ ერთი ბინა იყო გაქურდული.
აღკვეთის ღონისძიების შეფარდების საკითხზე სასამართლო უახლოეს ხანში იმსჯელებს.