ბათუმში, სავაჭრო ობიექტში წუხელ გაჩენილი ხანძრის შედეგად დაზარალებული მოვაჭრეები ხელისუფლებას დახმარებას და ბანკებთან შუამდგომლობას სთხოვენ.
როგორც ისინი აცხადებენ, ხანძრის შედეგად „სერიოზული ზარალი მიადგათ“, მაღაზიები კი დაზღვეული არ ჰქონიათ.
„საქონელი მთლიანად დაგვეწვა. ბანკებიდან კრედიტები გვაქვს აღებული. როგორ უნდა გადავიხადოთ, არ ვიცით“, – აცხადებენ მოვაჭრეები.
წერეთლისა და პუშკინის ქუჩების მიმდებარედ არსებულ სავაჭრო ობიექტში, სადაც წუხელ ხანძარი გაჩნდა, ამ დრომდე სამართალდამცავები მუშაობენ. დამწვარი შენობა სპეციალური ლენტითაა შემოსაზღვრული.
აღსანიშნავია, რომ ხანძრის შედეგად საღებავების სავაჭრო ობიექტების გვერდით განთავსებული საცხოვრებელი სახლის სახურავიც დაიწვა. სახლის მეპატრონეც ასევე, ხელისუფლებას სახურავის შეკეთებას სთხოვს.
ხანძარი ამ დროისათვის ლიკვიდირებულია, თუმცა პრევენციის მიზნით შემთხვევის ადგილზე ერთი სახანძრო ავტომობილი მაინც რჩება.
ბათუმის სავაჭრო ცენტრში ხანძარ ღამის საათებში გაჩნდა და 560 კვადრატულ მეტრ ფართობს მოედო, ხანძრის სწრაფ გავრცელებას სავაჭრო ცენტრში არსებულმა ადვილად აალებადმა პროდუქციამ შეუწყო ხელი .- ცეცხლმა სრულად გაანადგურა სავაჭრო ცენტრის ერთი ნაწილი – 10 მაღაზია, ასევე დამწვარია სავაჭრო ცენტრის სახურავი.მოვაჭრეების განცხადებით, არსებობდა ცეცხლის გავრცელების საშიშროება სავაჭრო ცენტრის გვერდით მდებარე ბაზრობაზეც, თუმცა ხანძრის ძირთადი კერების ლოკალიზება დროულად მოხდა.
ცეცხლის ლიკვიდაციაზე მთელი ღამის განმავლობაში ადგილზე 12 სახანძრო ბრიგადა და 65 მეხანძრე მაშველი მუშაობდა.
.