ჯონ მაკკეინის გარდაცვალებასთან დაკავშირებით თეთრმა სახლმა ოფიციალური განცხადება მოამზადა, თუმცა, მისი გამოქვეყნება დონალდ ტრამპმა არ ისურვა.
გაზეთ ვაშინგტონ პოსტის ცნობით, შეერთებული შტატების პრეზიდენტმა თავის მრჩევლებს უთხრა, რომ განცხადებას მხოლოდ ტვიტერის სოციალურ ქსელში გააკეთებდა. ტვიტერში გამოეხმაურა ჯონ მაკკეინის გარდაცვალებას მელანია ტრამპიც, თუმცა, მეუღლისგან განსხვავებით, პირველმა ლედიმ სენატორს ქვეყნის ერთგული სამსახურისთვის საჯაროდ მადლობა გადაუხადა.
დონალდ ტრამპი აშკარად გაღიზიანებულია – როგორც ჩანს, ეს არის რეაქცია სენატორის ანდერძზე, რომელიც ახლა აშშ-სა და მსოფლიოში განიხილება.
სენატორ ჯონ მაკკეინის ოჯახმა დაადასტურა, რომ აშშ-ს პრეზიდენტი დონალდ ტრამპი არ იქნება დაპატიჟებული ჯონ მაკკეინის დაკრძალვის ცერემონიაზე.
ეს იყო სურვილი თავად სენატორ მაკკეინისა , რომელმაც სიკვდილამდე განსაზღვრა იმ პირთა სია, ვინც დაესწრებოდა მის დაკრძალვას. სენატორ მაკკეინის სურვილი იყო ასევე, რომ მისი დაკრძალვის ცერემონიაზე სიტყვით გამოსულიყვნენ ყოფილი პრეზიდენტები ბარაკ ობამა და ჯორჯ ბუშ უმცროსი.
სოციალური ქსელში სამძიმარი გამოუცხადეს მაკკეინის ოჯახს ყოფილმა პრეზიდენტებმა ჯორჯ ბუშმა, ბარაკ ობამამ, ჯიმი კარტერმა და ბილ კლინტონმა მეუღლესთან ერთად.
სენატორის გარდაცვალების გამო, მწუხარება გამოთქვეს მსოფლიო ლიდერებმაც, მათ შორის ჯასტინ ტრუდომ, ტერეზა მეიმ, ბენიამინ ნეთანიაჰუმ და ანგელა მერკელმა, რომელმაც ინსტაგრამის სოციალურ ქსელში ჯონ მაკკეინთან ერთად გადაღებული ფოტო გამოაქვეყნა.
29 აგვისტოს სენატორ ჯონ მაკკეინის სამოქალაქო პანაშვიდი არიზონას შტატის კაპიტოლიუმში გაიმართება, 30 აგვისტოს – ბაპტისტურ ეკლესიაში, 31 აგვისტოს ვაშინგტონში აშშ-ს კაპიტოლიუმში, ხოლო 1-ელ სექტემბერს ვაშინგტონის ეროვნულ საკათედრო ტაძარში. სენატორ ჯონ მაკკეინის დაკრძალვის ცერემონია 2 სექტემბერს გაიმართება.იგი დაიკრძალება ქალაქ ანაპოლისში, მერილენდის შტატში , სადაც მდებარეობს აშშ-ს საზღვაო აკადემია, რომელიც სენატორმა დაამთავრა. ამის შესახებ ინფორმაციას გარდაცვლილი სენატორის პრესსამსახური ავრცელებს
ფოტოზე: რონალდ რეიგანი ტყვეობიდან დახსნილ ეროვნულ გმირს ხვდება