თბილისში გარდაცვლილი ამერიკელი სენატორის, ჯონ მაკკეინის ხსოვნას პატივი მიაგეს. წუხელ რუსთაველის გამზირზე, პარლამენტის შენობასთან სანთლები და ამერიკა-საქართველოს დროშები მიიტანეს. ადგილზე პოლიტიკოსები, ჟურნალისტები და რიგითი მოქალაქეები შეიკრიბნენ.
შეკრების ორგანიზატორი გაერთიანებული ოპოზიციაა. აქციის წევრების თქმით, სენატორი მაკკეინი ძლიერი პოლიტიკოსი და საქართველოს მტკიცე მხარდამჭერი იყო.
ოპოზიციური პარტიის წევრების თქმით, სენატორის გარდაცვალებით, საქართველომ ერთგული მეგობარი დაკარგა. ისინი ამბობენ, რომ ჯონ მაკკეინმა 2008 წლის რუსეთ-საქართველოს ომის დროს, ჯონ მაკკეინმა საკვანძო როლი ითამაშა.
ბათუმის საკრებულოში ფრაქცია "ერთიანი ნაციონალური მოძრაობის" თავმჯდომარე მირდატ ქამადაძე ლერმონტოვის ქუჩის სახელწოდების შეცვლას და სენატორ ჯონ მაკკეინის სახელის მინიჭებას ითხოვს.
როგორც მან "ინტერპრესნიუსთან" საუბრისას განაცხადა, მაკკეინს საქართველო წინაშე უდიდესი დამსახურება აქვს და სწორედ მისი სახელი უნდა მიენიჭოს აღნიშნულ ქუჩას.
"საჯაროდ გამოვდივარ წინადადებით, ბათუმში, ლერმონტოვის ქუჩას ეწოდოს სენატორ ჯონ მაკკეინის სახელი. რა დამსახურებაც აქვს ამ ადამიანს საქართველოს წინაშე ამაზე აღარ შევაჩერებ თქვენს ყურადღებას, ისედაც ყველასთვის ცხადია. ეს ჩემი პირადი პოზიციაა",- აცხადებს მირდატ ქამადაძე.