ცენტრალურმა საარჩევნო კომისიამ არაიდენტიფიცირებული პირების მიერ საოლქო კომისიებში განხორციელებულ სატელეფონო კომუნიკაციაზე საუბრობს და ამგვარ ქმედებას საარჩევნო ადმინისტრაციასთან შეუთავსებლად მიიჩნევს. ცესკოს მიერ გავრცელებული განცხადებიდან ირკვევა რომ უცხო პირების მიერ ხდებოდა საოლქო საარჩევნო კომისიის ხელმძღვანელი პირების მიმართ შეტყობინების გადაცემა, თითქოს ისინი დაბარებულები იყვნენ შეხვედრებზე რეგიონის ახალ გუბერნატორებთან. სატელეფონო ზარი გუშინ განხორციელდა #67 ზუგდიდის საოლქო საარჩევნო კომისიის თავმჯდომარესთანაც. მირანდა მესხის თქმით, სატელეფონო ზარი განხორციელდა სახელისუფლებო პარტიის სახელის გამოყენებითაც, ვითომდა მათ მიერ „გადაგზავნილი“ საარჩევნო უბანში ასარჩევი პირების სიის მიღების დასადასტურებლად.მსგავსი შინაარსის სატელეფონო ზარები ცესკოს ინფორმაციით, დაფიქსირებულია გარდაბნის, მარნეულის, ზუგდიდის, თბილისის რამდენიმე საარჩევნო ოლქში და ა. შ.
ცესკო მიმართავს დამოუკიდებელ დამკვირვებლებს, საერთაშორისო ორგანიზაციებს, მედიას, გააძლიერონ ძალისხმევა, დააკვირდნენ საარჩევნო ადმინისტრაციისა და სხვა ჩართული მხარეების საქმიანობას, აქტიურად ჩაერთონ საარჩევნო პროცესებში, რაც ხელს შეუწყობს გამჭვირვალე, უსაფრთხო და სანდო საარჩევნო გარემოს ჩამოყალიბებას