ბათუმში, აეროპორტის გზატკეცილზე მუნიციპალური ავტობუსი გაჩერებულ სატვირთო ავტომობილს შეეჯახა.ავტოსაგზაო შემთხვევის შედეგად, 9 ადამიანი დაშავდა.
როგორც ბათუმის სასწრაფო-სამედიცინო დახმარების ცენტრის ცნობით, დაშავებულები ქალაქის სამ საავადმყოფოში გადაიყვანეს. ერთი მათგანის მდგომარეობა მძიმეა, მას ტრავმა თავის არეში აქვს მიღებული,, ხოლო 8 დაშავებულს დაჟეჟილობა და მოტეხილობები აღენიშნება.
შინაგან საქმეთა სამინისტროს ინფორმაციით, მომხდარ ფაქტზე გამოძიება სისხლის სამართლის კოდექსის 276-ე მუხლის 1-ლი ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის ნაკლებად მძიმე დაზიანება გამოიწვია და ითვალისწინებს თავისუფლების აღკვეთას 3 წლამდე ვადით.