სამედიცინო საქმიანობის სახელმწიფო რეგულირების სააგენტომ 13 აგვისტოს გამოსცა ბრძანება საქართველოს ფარმაცევტული ბაზრიდან კიდევ რამდენიმე მედიკამენტების ამოღების შესახებ.
ეს არის კიბოს რისკის შემცველი კარდიოლოგიური მედიკამენტები, ე.წ. წნევის წამლები. მათი რეესტრიდან ამოღებისა და იმპორტის შეჩერების შესახებ საქართველოს ჯანდაცვის სამინისტრომ საბაჟო გამშვებ პუნქტებს უკვე აცნობა.
საქართველოს სააფთიაქო ქსელებში ასეთი 11 დასახელების 42 სახეობის მედიკამენტი იყიდებოდა. ესენია:
Valsar-Denk (40მგ; 80მგ; 160მგ; 320მგ)
CoValsar-Denk (80/12,5; 160/12,5; 320/12,5)
CARDOPAN-SANOVEL (80მგ; 160მგ; 320მგ)
CARDOPAN-SANOVEL PLUS (80/12,5; 160/12,5; 320/12,5)
Valz (40მგ; 80მგ; 160მგ)
Valz H (80მგ; 160მგ)
NORTIVAN® (80მგ; 160მგ)
Cardofix-Sanovel (5მგ/160მგ; 10მგ/160მგ)
Cardofix-Sanovel Plus (5მგ/160მგ/12,5მგ; 5მგ/160მგ/25მგ; 10მგ/160მგ/12,5მგ; 10მგ/160მგ/25მგ)
Amva Denk (5მგ/80მგ; 5მგ/160მგ; 10მგ/160მგ)
Amva + HCTDenk (mite 5მგ/160მგ/12,5მგ; 10მგ/160მგ/12,5მგ
forte 10მგ/160მგ/25მგ).
საქართველოში აღნიშნული წამლების რეგისტრაციის შეჩერების ბრძანება, როგორც აღინიშნა, 13 აგვისტოს გამოიცა, თუმცა ისინი მომდევნო დღეებშიც იყო ხელმისაწვდომი აფთიაქებში. ამიტომ სიფრთხილე მომხმარებელსაც მართებს. საქმე ეხება აქტიურ სუბსტანცია “ვალსარ-ტანს“, რისგანაც ეს წამლები მზადდება და რომლის მწარმოებელიც ერთ-ერთი ჩინური ფარმაცევტული კომპანიაა.
სპეციალისტების განმარტებით, ჩინურმა კომპანიამ თავისი ტექნოლოგია შეცვალა, რის შემდეგაც გამოვლინდა, რომ ის მინარევს შეიცავს, რაც შესაძლოა, ონკოლოგიური დაავადების გამომწვევი რისკ-ფაქტორი იყოს
სამედიცინო საქმიანობის რეგულირების სახელმწიფო სააგენტოს ინფორმაციით, 2018 წლის 1-ელი იანვრიდან 1-ელ აგვისტომდე პერიოდში საქართველოს ფარმაცევტული ბაზრიდან სულ 380 868 ერთეული მედიკამენტი ამოიღეს. ამოღებულ მედიკამენტებს შორისაა დიაზეპამი (აღრიცხვის წესში ხარვეზის გამო), ვიტამინი B (შენახვის წესის დარღვევა) ოფტან-დექსამეტაზონი (რომლის შენახვის წესი იყო დარღვეული), მუკალტინი (ვადაგასული), კოლინი (ვადაგასული), გლემპიდი (ვადაგასული), ადიპი (ვადაგასული), ატენორიკი (ვადაგასული), ბლესტარი (ვადაგასული), სომნგამა (დარღვეული იყო აღრიცხვის წესი), მაგიტუსი (პრობლემა დაფიქსირდა ასევე აღრიცხვის წესში), ფენაზეპამი (დარღვეული იყო აღრიცხვის წესი), პროტარგოლი (ვადაგასული), ამტასი (შენახვის წესის დარღვევა) და ა.შ.
აღსანიშნავია, რომ ამოღებულ მედიკამენტებს შორის ,ყველაზე მეტი საქართველოში წარმოებული პროდუქტია. საქართველოში, პოლონეთსა და უკრაინაში წარმოებული მედიკამენტების ჩამორთმევის ღონისძიებების შედეგად 157 შემთხვევაში საქართველოში, 102 შემთხვევაში უკრაინაში, ხოლო 90 შემთხვევაში პოლონეთში წარმოებული ფარმაცევტული საშუალების ამოღება მოხდა.