მალხაზ მაჩალიკაშვილი სახელმწიფო უსაფრთხოების სამსახურში იმყოფება. ის კონტრტერორისტულ ცენტრში მოწმის სტატუსით არის დაბარებული. უწყებაში მაჩალიკაშვილთან კითხვები აქვთ 9 თვის წინ პანკისში ჩატარებული სპეცოპერაციასთან დაკავშირებით, როდესაც სპეცრაზმის მიერ გასროლილ ტყვიას მისი შვილი, თემირლან მაჩალიკაშვილი ემსხვერპლა.
მალხაზ მაჩალიკაშვილი აცხადებს, რომ ამ საქმესთან მას კავშირი არ აქვს და სუსი ცდილობს, რომ მასზე და მის ოჯახზე ზეწოლა მოახდინოს.მალხაზ მაჩალიკაშვილი არ გამორიცხავს, რომ მას ბრალი წარუდგინონ.
„თუ მე ტერორიზმის ხელშეწყობაში მადანაშაულებენ, ე.ი. ეს იმას ნიშნავს, რომ სახელმწიფო ჩადის კაცობრიობის წინაშე დანაშაულს. ინტერესი, ალბათ, ის აქვთ, რომ მთლიანად გამანადგურონ,“- განაცხადა მალხაზ მაჩლიკაშვილმა.
პანკისში ჩატარებული სპეცოპერაციის დროს მოკლული თემირლან მაჩალიკაშვილის მამა მანამდეც სუს-ში ტერორისტული ორგანიზაციის მხარდაჭერის საქმეზე იყო დაბარებული, რომელზეც რამდენიმე კვირის წინ სასამართლომ უკვე გამოიტანა განაჩენი და ბრალდებულები გაასამართლა.