მომავალი წლიდან მოსწავლეთა ტრანსპორტირების საკითხს ადგილობრივი თვითმმართველობები უზრუნველყოფენ. ითქვა რეგიონული განვითარებისა და განათლების მინისტრების მოადგილეების შეხვედრაზე დასავლეთ საქართველოს მუნიციპალიტეტების მერებთან.
შეხვედრაზე მთავარი განსახილველი თემა სამინისტროებს, საგანმანათლებლო და სამეცნიერო ინფრასტრუქტურის განვითარების სააგენტოსა და მუნიციპალიტეტებს შორის თებერვალში გაფორმებული მემორანდუმით გათვალისწინებული საკითხების აღსრულება იყო.
„გაიმართა სამუშაო შეხვედრა და საშუალება მოგვეცა დაგვენახა რამდენად მზად არიან მუნიციპალიტეტები, რომ ერთი კონკრეტული ფუნქცია – სკოლების სატრანსპორტო მომსახურება თვითმმართველობებში გადავიდეს. გამოჩნდა სირთულეები, პრობლემები, რაც ახლავს ამ საკითხს და დავინახეთ, სადაა საჭირო ჩვენი დახმარება“, – განაცხადა ილია ბეგიაშვილმა.
შეხვედრაზე აღინიშნა, რომ დეცენტრალიზაცია ევროინტეგრაციის პროცესის განუყოფელი ნაწილია, რომელიც თვითმმართველობებისთვის მეტი შესაძლებლობებისა და ფინანსების გადაცემას ითვალისწინებს.
