"მე არ ვადანაშაულებდი სააკაშვილს კრიზისის გამო და არც ახლა ვადანაშაულებ"- წერს "Washington Post"-ში გამოქვეყნებულ საავტორო სტატიაში ამერიკის ყოფილი სახელმწიფო მდივანი.
კონდოლიზა რაისმა აგვისტოს ომიდან ათის წლის შემდეგ 2008 წლის ომი და ომის დროს სერგეი ლავროვთან სატელეფონო საუბარი გაიხსენა.
კონდოლიზა რაისი ამბობს, რომ ლავროვმა მას პირდაპირ უთხრა, რომ მოსკოვის სურვილი საქართველოს ხელისუფლების შეცვლა იყო.
"მესამე პირობამ, რომელიც ლავროვის თქმით, მხოლოდ ჩვენს შორის უნდა დარჩენილიყო, შოკში ჩამაგდო: მან მითხრა: მიშა სააკაშვილი უნდა წავიდეს. ლავროვს ვუთხარი, რომ ამერიკის სახელმწიფო მდივანს და რუსეთის საგარეო საქმეთა მინისტრს ვერ ექნებოდათ საიდუმლო საუბარი დემოკრატიულად არჩეული პრეზიდენტის დამხობის შესახებ და რომ ამ მოთხოვნის შესახებ ყველას ვაცნობებდი. ის განრისხებული იყო, მაგრამ ჩვენ ეს გავაკეთეთ და რუსეთის ნამდვილი მოტივი მთელი მსოფლიოსთვის გახდა ცნობილი. სააკაშვილი ხელისუფლებაში დარჩა და ქართული დემოკრატია გადარჩა " – წერს კონდოლიზა რაისი.
როდესაც რუსეთმა საქართველოში სრულმასშტაბიანი შემოჭრა დაიწყო, შეერთებულმა შტატებმა პირველ რიგში ყურადღება საქართველოს დედაქალაქსა და კანონიერად არჩეული საქართველოს მთავრობის დაცვაზე მიაქცია. კონდოლიზა რაისი იხსენებს, რომ ბუშის ადმინისტრაციაში ნამდვილად აცნობიერებდნენ საქართველოში რუსეთის სამხედრო ქმედებების საფრთხეს და ჯერ კიდევ 2008 წლის გაზაფხულიდან, გერმანიასთან ერთად, ცდილობდნენ მოლაპარაკებას აფხაზეთისა და სამხრეთ ოსეთის სეპარატისტულ რეგიონებში მზარდი დაძაბულობის დეესკალაციის მიზნით.