აგვისტოს ომის 10 წლისთავთან დაკავშირებით მიძღვნილი გამოფენის მიმდინარეობისას, დიდ ბრიტანეთში საქართველოს საელჩოში ვიდეო-კამერით შეიჭრა პირი, რომელიც აგრესიულად იქცეოდა და ნატო-ს საწინააღმდეგო ლოზუნგებს სკანდირებდა.
დიდ ბრიტანეთში საქართველოს ელჩმა თამარ ბერუჩაშვილის განცხადებით, ეს პირი ბრიტანელი ჟურნალისტი გრემ ფილიპსია.
„საელჩოს მიერ გამოძახებული იქნა დიპლომატიური პოლიცია, რომელიც მყისიერად გამოცხადდა შემთხვევის ადგილას და შენობაში შეჭრილი პირი დააკავა. ამჟამად მომხდარზე მიმდინარეობს გამოძიება – აცხადებს თამარ ბერუჩაშვილი.
„რია ნოვოსტის“ ინფორმაციით, დაკავებული ჟურნალისტი გრემ ფილიპსი ადრე უკრაინაში ტელეარხ „Russia Today”-ის შტატგარეშე კორესპონდენტად მუშაობდა. უკრაინაში მუშაობის დროს ქვეყნის უშიშროების სამსახურმა ის ორჯერ დააკავა. 2016 წელს ფილიპსი რიგაში ლატვიურმა პოლიციამაც დააკავა.