რუსეთ-საქართველოს ომი და დამოუკიდებელი საპრეზიდენტო კანდიდატის, სალომე ზურაბიშვილის სკანდალური განცხადება – საპრეზიდენტო კანდიდატი საქართველოს აგვისტოს ომის დაწყებაში კიდევ ერთხელ ადანაშაულებს.
ზურაბიშვილი ამბობს, რომ პოზიცია საკითხთან დაკავშირებით 10 წლის შემდეგაც არ შეუცვლია.
მმართველი გუნდის ნაწილი გაცხადების კომენტირებისგან თავს იკავებს, მეორე ნაწილი კი შეფასებას არ იზიარებს.
"ქართული ოცნების" ლიდერებს არ აქვთ პასუხი კითხვაზე – როგორ შეიძლება პრეზიდენტის პოსტი დაიკავოს ადამიანმა, რომელიც საკუთარ ქვეყანას ომის დაწყებაში ადანაშაულებს.
საქართველოს პარლამენტის თავმჯდომარემ, ირაკლი კობახიძემ საპრეზიდენტო კანდიდატის განცხადებებზე საუბრისგან დღეს თავი შეიკავა.
საპარლამენტო უმრავლესობის წევრები აცხადებენ, რომ სალომე ზურაბიშვილმა თავად უნდა განმარტოს საკუთარი განცხადება.
ზურაბიშვილის აზრს არ იზიარებს პარლამენტის წევრი, ისნის მაჟორიტარი დეპუტატი, დავით ჭიჭინაძე.
„მე ამ შემთხვევაში ვერ გავიზიარებ ქალბატონი სალომეს აზრს იმიტომ, რომ მე ვთვლი, რომ ნებისმიერი ომის დაწყება ეს არის ყოველთვის ძლიერი მხარის პრეროგატივა იმიტომ, რომ სუსტი ვერასდროს ვერ დაიწყებს ომს, ლოგიკა ამაში არის. როგორ შეიძლება იდგეს ორმეტრიანი კაცი და მას გაუბედოს 5 წლის ბავშვმა მუშტების რტყმა, თუ ის არ მისცემს ამის საშუალებას,“ – განაცხადა დავით ჭიჭინაძემ.