ხორავას ქუჩაზე მოკლული მოზარდის, დავით სარალიძის მამამ, ზაზა სარალიძემ და ჟურნალისტმა ელისო კილაძემ დღეს გერმანიის საელჩოს წერილით მიმართეს.
მათ დიპლომატიურ უწყებას დეტალური ინფორმაცია მიაწოდეს იმის შესახებ, თუ რატომ, სად და ვისთან მიდიოდნენ სტრასბურგში.
სარალიძე და კილაძე კვირის ბოლომდე გერმანიის ელჩთანაც გეგმავენ შეხვედრას. ზაზა სარალიძე, ელისო კილაძე და მალხაზ მაჩალიკაშვილი აცხადებენ, რომ სტრასბურგში დაგეგმილი შეხვედრები სახელმწიფო უსაფრთხოების სამსახურმა მიზანმიმართულად ჩაუშალა.
„ველოდები ხელისუფლების წარმომადგენლებიდან იმ პასუხს, თუ რატომ მოიქცა ხელისუფლება ასე, რატომ მომექცა არა მარტო მე, არამედ მალხაზ მაჩალიკაშვილს, რატომ დამადანაშაულეს ტერორისტობაში. ფაქტია, რომ ტერორისტობაში დამადანაშაულეს და რატომ გადადგა ეს ნაბიჯი ხელისუფლებამ,“ – განაცხადა ზაზა სარალიძემ.
როგორც მათ გაარკვიეს, თბილისიდან ევროკავშირის წევრ ქვეყნებში გაიგზავნა წერილები, სადაც წერია, რომ ამ ჯგუფში ტერორისტულ საქმიანობაში ბრალდებულებიც არიან.
ელისო კილაძის განცხადებით, სტრასბურგში მათი სტუმრობის ჩაშლა პირდაპირ სუს-ის ინტერესებიდან გამომდინარეობს. კილაძის განცხადებით, 19 წლის თემირლან მაჩალიკაშვილის ლიკვიდაციაში მონაწილეობდა სუს-ის სპეცდანიშნულების რაზმი და სპეცოპერაციას იოსებ გოგაშვილი ხელმძღვანელობდა.
სტრასბურგში გამგზავრებას ელისო კილაძე შვილმოკლულ მშობლებთან ერთად 5 აგვისტოსთვის გეგმავდა.
როგორც სარალიძე, ისე მაჩალიკაშვილი მიიჩნევენ, რომ სამართალი არც ერთ საქმეზე არ დამდგარა.