ზოგადი უნარების გამოცდის მინიმალური ბარიერი აბიტურიენტების 13 %-მა ვერ გადალახა.
როგორც გამოცდების ეროვნულ ცენტრში აცხადებენ, . ისინი, სამწუხაროდ, კონკურსს გამოეთიშებიან.
ტესტები სხვადასხვა სირთულის იყო, მესამე ვარიანტი აღმოჩნდა საშუალოზე მარტივი და მისი მინიმალური ზღვარი 24 ქულით განისაზღვრა, პირველი და მეოთხე ვარიანტის 23 ქულით და მეორე ვარიანტის, 22 ქულით – განაცხადა ზოგადი უნარების ჯგუფის ხელმძღვანელმა სოფო დოლიძემ.
მისივე თქმით, აბიტურიენტები, რომლებმაც რთული ვარიანტი დაწერეს, არ დაიჩაგრებიან, რასაც სკალირების პროცედურა უზრუნველყოფს.
„იმისათვის, რომ არ დაიჩაგრონ ის აბიტურიენტები, რომლებმაც შედარებით რთული ვერსიები შეასრულეს, ჩვენ მერე უკვე სკალირების პროცედურას მივმართავთ. სკალირების პრინციპი არის, რომ ჩვენ ქულებს მაქსიმალურად ვათანაბრებთ ერთმანეთთან. ასე, რომ ამ თვალსაზრისით აბიტურიენტებმა არ უნდა ინერვიულონ, თუ რთული ვარიანტი შეასრულეს, ეს მათ აუცილებლად დაუფასდებათ“, – განაცხადა სოფო დოლიძემ.
დღეს ზოგადი უნარების გამოცდის შედეგები გახდა ცნობილი, დანარჩენი გამოცდების შედეგები ეტაპობრივად გამოცხადდება და გრანტების საკითხი მხოლოდ მას შემდეგ გაირკვევა, რაც ყველა გამოცდის ქულები გახდება ცნობილი.