ჰამბურგში გერმანიის ღია პირველობის ფინალში ნიკოლოზ ბასილაშვილმა არგენტინელი ლეონარდო მაიერი დაამარცხა (6:4, 0:6, 7:5). მან 349 200 ევრო და 500 სარეიტინგო ქულას გამოიმუშავა, რითაც მსოფლიო რეიტინგის 35-ე ნომერი გახდა. დამოუკიდებელი საქართველოს ისტორიაში მისი მაჩვენებელი საუკეთესოა და საგრძნობლად უსწრებს შედეგს, რომელიც აქამდე ირაკლი ლაბაძეს ჰქონდა – ის რეიტინგში 42-ე პოზიციაზე იმყოფებოდა.
ნიკოლოზ ბასილაშვილს გამარჯვებულის პრიზი ლეგენდარულმა გერმანელმა ჩოგბურთელმა მიხაელ შტიხმა გადასცა.
"თანაბარი თამაში იყო, საუკეთესოდ არ მიასპარეზია, ჭკვიანურად ვითამაშე. გამარჯვების მცირე შანსი მქონდა და გამოვიყენე. ემოციების გაკონტროლება მოვახერხე. ბედნიერი და დაღლილი ვარ, დავისვენებ და ავსტრიული ტურნირისთვის მოვემზადები.
ორი თვეა ახალ მწვრთნელთან ერთად ვმუშაობ, რამდენიმე თამაში მაღალ დონეზე ჩავატარე. ტურნირის მოგება ადვილი არ იყო. თუმცა, ამით ჩემთვის არაფერი შეცვლილა, წარმატება უფრო თავდაჯერებულს გამხდის.
ჩემი გამარჯვება საქართველოში ჩოგბურთის პოპულარიზაციას შეუწყობს ხელს. ბავშვები უფრო სერიოზულად მიუდგებიან საქმეს. ჩემთვის მნიშვნელოვანია, რომ ამ ტურნირის მომგები პირველი ქართველი ვარ", – განაცხადა ნიკოლოზ ბასილაშვილმა.