საქართველოს ყოფილი პრეზიდენტის მიხეილ სააკაშვილის განცხადებამ ბიძინა ივანიშვილის ინტერვიუზე საუბრისას იმის შესახებ, რომ დასავლეთის ქვეყნების ელჩებმა გააფრთხილეს ბიძინა ივანიშვილი რომ საპრეზიდენტში არჩევნებში მისი კანდიდატურის წარდგენა იქნებოდა ცუდი, გააღიზიანა ბიძინა ივანიშვილის გუნდის წევრები.
საქართველოს პარლამენტის თავმჯდომარის პირველი მოადგილე თამარ ჩუგოშვილი აცხადებს, რომ მიხეილ სააკაშვილის ეს განცხადება არის საქართველოში აკრედიტებული ყველა დიპლომატის შეურაცხყოფა და მათი სახელით მანიპულირება.
ამავე დროს, როგორც ჩუგოშვილი აცხადებს, საპრეზიდენტო არჩევნებზე ბიძინა ივანიშვილის პოზიციამ ელჩებში აღფრთოვანება გამოიწვია.
,, ბიძინა ივანიშვილის შეხვედრა დიპლომატიურ კორპუსთან მე დავაორგანიზე და რამდენიმე ადამიანთან ერთად თავიდან ბოლომდე ვესწრებოდი.
პრეზიდენტის არჩევნებზე ბიძინა ივანიშვილის პოზიციამ გამოიწვია აღფრთოვანება ელჩებში და ამას ვამბობ ყოველგვარი გადაჭარბების გარეშე. მან გააჟღერა ზუსტად იგივე პოზიცია, რაც თქვა ეთერში, საჯაროდ, ინტერვიუს დროს. მთლიანად შეხვედრა იყო ძალიან კარგი, ბევრი დადებითი ემოციით და პოზიტიური შეფასებით. ვისაც სიმართლე აინტერესებს, სიმართლე ესაა“, – აცხადებს თამარ ჩუგოშვილი.