ეროვნულ სატყეო სააგენტოში აცხადებენ, რომ  ცეცხლის გავრცელების მასშტაბი არ გაზრდილაა, მაგრამ  ხეების ქვეშ ტორფი იწვის, რის გამოც დარჩენილი კერების ლოკალიზება რთულდება.

 

„გუშინ თითქოს უკვე ლოკალიზებული იყო ცეცხლი, მაგრამ როგორც ჩანს, დღეს ახალ-ახალი კერებია და რთულდება სალიკვიდაციო სამუშაოები. ხეების ქვეშ ტორფი იწვის და ეს ქმნის ყველაზე დიდ სირთულეს. პატარა ნიავიც კი პროვოცირებადია. იმდენად მიუვალი ადგილია, რომ ჩვენი ვარაუდით, მეხის დაცემამ გააჩინა ცეცხლი. მასშტაბი არ გაზრდილა, ისევ 2.5 ჰექტარია დამწვარი და ხანძრით მიყენებული ზარალი ცეცხლის სრულად ლიკვიდაციის შემდეგ დაითვლება.

 

ადგილზე მობილიზებულია როგორც საგანგებო სიტუაციების მართვის ასევე მთელი რეგიონის სატყეო სამსახური და ხელით მიმდინარეობს სამუშაოები. თუ ქარი არ ამოვარდა, მე ვფიქრობ, რომ დღეს ცეცხლის ლოკალიზება უნდა მოხერხდეს,“ – განაცხადა ეროვნული სატყეო სააგენტოს უფროსმა თორნიკე გვაზავამ.

 

ლენტეხში, სოფელ ზესხოს ტყეში ხანძარი 2 დღის წინ გაჩნდა. ძლიერი ხანძრის შედეგად დამწვარია 2.5 ჰა ფართობი.

 

ხანძრის ადგილი დასახლებული პუნქტიდან საკმაოდ დაშორებულია. დაზუსტებული ინფორმაცია გამომწვევ მიზეზებთან დაკავშირებით უცნობია. არ გამოირიცხება, რომ ცეცხლი მეხის გავარდნის შედეგად გაჩენილიყო.