ამ წუთებში მცხეთის საქალაქო სასამართლო ხადას ხეობაში მომხდარი საზარელი მკვლელობის ბრალდებით დაკავებული მალხაზ კობაურისთვის აღკვეთის ღონისძიების შეფარდებაზე მსჯელობს.
ბრალდებულმა სასამართლოში მიმდინარე პროცესზე განაცხადა , რომ სმიტების ოჯახის წევრები მას არ მოუკლავს.
,,ისინი მე არ დამიხოცავს. ორი უცხოელი მამაკაცი იყო და იმათ დახოცეს. მე დამემუქრნენ, რომ ოჯახს ამომიწყვეტდნენ“, – განაცხადა კობაურმა.
,,სიმართლე თქვი შვილო, გემუდარები. მხოლოდ ამას გთხოვ'' – ასე მიმართა ბრალდებულს დედამ, მარიამ მარტიაშვილმა სასამართლო დარბაზში. ოჯახის ვერსიით, კობაურს გარკვეულმა დანაშაულებრივმა ჯგუფმა აყურებინა, თუ როგორ კლავდნენ ოჯახს და შემდეგ ეს დანაშაული მას დააბრალა.
"ჩემი დის შვილი მკვლელი არ არის. ამის უკან დგას ჯგუფი, რომელმაც აყურებინა ჩემ დისშვილს ეს მკვლელობა და დააბრალა ამას. არ ვიცი ვის ინტერესებში შედიოდა მისთვის ამ დანაშაულის დაბრალება. ძალიან უკონფლიქტო ბავშვია. ჭკვიანია და ასევე ძალიან მშიშარა",
"შესაძლოა, მასზე განხორციელდა ზეწოლაც, მათ შორის მკვლელის მხრიდანაც. ეს პატარა ბიჭი ვერ ჩაიდენდა ასეთ მკვლელობას, მითუმეტეს ბავშვის მკვლელობას. თუ მან მოკლა, დამარხა, კვალი დაფარა და ამის მერე სამართალდამცველებთან ითანამშრომლა? ეს ხომ ცოტა აბსურდია", – აღნიშნა შორენა მარტიაშვილმა.
სმიტების ოჯახის სამი წევრის მკვლელობაში ბრალდებულ მალხაზ კობაურის ადვოკატმა სასამართლო პროცესის დახურვა მოითხოვა. საფუძვლად არასრულწლოვანთა მართლმსაჯულების კოდექსი დაასახელა და განმარტა, რომ ბრალდებული 21 წელს მიუღწეველია. ამასთან, ადვოკატმა სხდომის დახურვის მოტივად საქმის რეზონანსულობა და სენსიტიურობაც დაასახელა.
ბრალდების მხარე არ დაეთანხმა აღნიშნულ შუამდგომლობას და აღნიშნა, რომ სასამართლო სხდომის დახურვის საფუძველი არ არსებობს. საბოლოოდ მოსამართლემ არ დააკმაყოფილა დაცვის მხარის შუამდგომლობა და პროცესი ღია რეჟიმში გრძელდება.
მალხაზ კობაურს ბრალი ოფიციალურად გუშინ წარედგინა. მას დამამძიმებელ გარემოებაში ჩადენილ ორი ან მეტი პირის, მათ შორის, დამნაშავისთვის წინასწარი შეცნობით არასრულწლოვნის განზრახ მკვლელობას ედავებიან. თუ დაკავებულს ეს ბრალი დაუდასტურდა , მას უვადო თავისუფლების აღკვეთა ელის.