ჩვენ ვითხოვთ იმ მტკიცებულებებს, სადაც დასტურდება თემირლან მაჩალიკაშვილის დანაშაული, თუმცა ასეთი არ არსებობს, – ამის შესახებ სახელმწიფო უსაფრთხოების სამსახურთან გამართულ საპროტესტო აქციაზე პანკისის ხეობაში სპეცოპერაციის შედეგად დაღუპული თემირლან მაჩალიკაშვილის ნათესავმა, ალიკა ალაზოვმა განაცხადა.
მისი თქმით, აუცილებელია სასწრაფოდ მოხდეს მომხდარზე ობიექტური სურათის დადება და დამნაშავე პირების დასჯა.
"მე მინდა, რომ სამართლიანობა აღდგეს, პასუხისგებაში მიეცნენ ის ადამიანები, ვინც უშუალოდ მოკლა თემირლანი, ასევე ვინც გასცა ბრძანება“, – განაცხადა ალიკა ალაზოვმა.
პანკისში ამ წუთებში აქცია მიმდინარეობს. ადგილობრივები სოფელ დუისში შეიკრიბნენ და სპეცოპერაციის დროს მოკლული 19 წლის თემირლან მაჩალიკაშვილის უდანაშაულოდ ცნობას ითხოვენ.
აქციის მონაწილეები აცხადებენ, რომ მომხდარიდან 6 თვე გავიდა და სპეცოპერაციის მონაწილე პირები ამ დრომდე დაუსჯელები არიან. ისინი ასევე განმარტებას ითხოვენ, რატომ ამ წარადგინა პროკურტურამ ის მტკიცებულები რაც მაჩალიკაშვილის ტერორიზმთან კავშირს დაადასტურებდა. მოთხოვნების გაუთვალისწინებლობის შემთხვევაში, თემირლან მაჩალიკაშვილის ოჯახი არ გამორიცხავს, რომ აქციები თბილისში გაგრძელდეს.
პანკისში აქციას შეუერთდა ხორავას ქუჩაზე მოკლული დავით სარალიძის მამა, ზაზა სარალიძე.
