ხორავას ქუჩაზე მოკლული მოზარდის მამის, ზაზა სარალიძის გამოკითხვა შინაგან საქმეთა სამინისტროში დასრულდა.
მოკლული მოზარდის მამამ შინაგან საქმეთა სამინისტროს კიდევ ერთხელ მიაწოდა დეტალური ინფორმაცია მისი შვილის მკვლელობის საქმეზე.
ზაზა სარალიძის განცხადებით, ის მზად არის თანამშრომლობის გასაგრძელებლად და დაინტერესების შემთხვევაში შინაგან საქმეთა სამინისტროში კვლავ მივა.
ზაზა სარალიძის მთავარი მოთხოვნაა, პირველ ეტაპზე სავარაუდო პასუხისმგებელი პირების გამოკითხვა მოხდეს.
ზაზა სარალიძემ შსს-ში წინა შეხვედრაზე გამომძიებლებს იმ ადამიანების ვინაობა დაუსახელა, ვინც მისი ინფორმაციით, მკვლელობაში მონაწილეობდა ან დამნაშავეებს ხელს აფარებდა.
მოკლული მოზარდის მამა დღეს ასევე, იმყოფებოდა საქალაქო სასამართლოში, სადაც მან ოფიციალური განაცხადი დატოვა. ის ითხოვს ხორავას საქმის უკვე მსჯავრდებული პირების დასაბუთებული განაჩენის მიღებას.
მისი თქმით, მნიშნველოვანია გაიგოს გაიზიარა თუ არა მოსამართლემ ერთ-ერთი მთავარი მოწმის, მიხეილ კალანდიას ჩვენება ხორავას ქუჩის საქმეზე განაჩენის მიღებისას.
შინაგან საქმეთა სამინისტროს ხორავას ქუჩის საქმეზე გამოძიება საქალაქო სასამართლოს განაჩენის გამოცხადების შემდეგ დაუბრუნდა.