ზუგდიდის ისტორიულ-არქიტექტურული მუზეუმიდან გათავისუფლებულმა თანამშრომელმა ყოფილი დირექტორის წინააღმდეგ დავა უზენაეს სასამართლოშიც მოიგო. უზენაესი სასამართლოს განჩინებით ზუგდიდის დადიანების მუზეუმს დაევალა ელზა ზოდელავას სამსახურში აღდგენა და განაცდურის ანაზღაურება, რაც დღეის მდგომარეობით, 6000 ლარს შეადგენს. მოსარჩელის ინტერესებს სასამართლოში ორგანიზაცია „საერთაშორისო გამჭვირვალობა – საქართველოს“ იურისტი ლელა მოწონელიძე იცავდა.ელზა ზოდელავა მუზეუმის დირექტორმა 2017 წლის 1- თებერვალს თანამდებობიდან გაათავისუფლა. პირველმა ინსტანციის სასამართლომ არ დააკმაყოფილა სასარჩელო მოთხოვნა, რასაც არ დაეთანხმა ქუთაისის სააპელაციო სასამართლო და მიიჩნია, რომ გათავისუფლების ბრძანება უკანონო იყო. უზენაესი სასამართლოს განჩინებით ძალაში დარჩა სააპელაციო სასამართლოს გადაწყვეტილება.