ოკუპირებულ აფხაზეთში აღშფოთებული არიან იმით, რომ მსოფლიო მედია ConIFA-ს (დამოუკიდებელი საფეხბურთო ასოციაციების კონფედერაცია) ეგიდით მიმდინარე საერთაშორისო საფეხბურთო ჩემპიონატში აფხაზური ს საფეხბურთო ნაკრები მონაწილეობის შეფასებისას დაუფარავად ქილიკობდ რესპუბლიკის სტატუსთან დაკავშირებით.
როგორც სოხუმელი ჟურნალისტი იზიდა ჭანია ვალალებს, ,,მედია კომპანიები აფხაზეთისა და ტიბეტის ნაკრებს შორის მსოფლიო ჩემპიონატის შესახებ გესლიან ხუმრობებს ერთმანეთს არ აცლიდნენ, კონკრეტულად – ConIFA–ს ვერსიით, აფხაზეთი, საქართველოს შემდეგ ფრჩხილებში იწერება. ამის შემდეგ მოდის ფრაზა, რომელიც სასიკვდილო დარტყმის ტოლფასია, კონკრეტულად: “2016 წელს, ConIFA–ს ჩემპიონატი ფეხბურთში სწორედ საქართველოში მიმდინარეობდა''. ცნობისთვის მათთვის, ვინც არ იცის, – იმ წელს ეს ზემოთ ხსენებული ჩემპიონატი, აფხაზეთის დედაქალაქ სოხუმში გაიმართა” – წერს იგი.
ამგვარმა ფორმულირებამ, რომლის თანახმად სოხუმი, სადაც წინამორბედი ჩემპიონატი გაიმართა, საქართველოა, დიდი ხნით გაუფუჭა განწყობა აფხაზებს, რომლებიც თვლიან, რომ ნებისმიერი გასვლითი ღონისძიება, სპორტული იქნება ეს თუ კულტურული , პოლიტიკურ დატვირთვას ატარებს და მათი წარმომადგენელის მონაწილეობა სადმე, “საზღვარგარეთ” , შედეგის მიუხედავად, გამარჯვებაა, რადგან მის ახალ სტატუსს უწევს პოპულარიზაციას., ლონდონში კი ეს სტატუსი საქილიკო გაუხადეს.
,, დამნაშავე ამაში, აფხაზი ჟურნალისტის თქმით, ქართული მხარეა, თუმცა არა მხოლოდ ის. იგი მწვავედ აკრიტიკებს აფხაზეთის მთავრობას, რომელიც არაფერს უპირისპირებს ქართულ პროპაგანდას მსოფლიო მედიაში.
,,დროა შევიმუშავოთ ფორმულირება, რომლის საშუალებითაც ჩვენი მკითხველი გაიგებს, რომ საქართველოს ხელისუფლება არ არის ყველაფერზე პასუხისმგებელი, რაც აფხაზეთში ხდება და კიდევ, – იქნებ როგორმე ავუხსნათ ევროპას, რომ აფხაზეთი უკვე დიდი ხანია საქართველოს იურისდიქციის ქვეშ არ არის…”- წერს იზიდა ჭანია.
შეგახსენებთ, ConIFA ნაწილობრივ აღიარებული ქვეყნების საფეხბურთო ასოციაციებს აერთიანებს. წელს კონფედერაციამ ტურნირი ლონდონში გამართა.