თბილისში, მოსწავლე-ახალგაზრდობის სასახლეში 100 წლის წინანდელი მოვლენის თეატრალიზებული ინსცენირება მოეწყო. მხატვრული დადგმა რეალურ მოვლენებს ეფუძნება. იმ პერიოდის მოღვაწეები არტისტებმა განასახიერეს. მაყურებელმა მოისმინა ნოე ჟორდანიას მიერ წარმოთქმული სიტყვა.
დამოუკიდებლობის გამოცხადების წუთები მთლიანად აღდგენილია ეროვნული საბჭოს ისტორიული სხდომის ოქმის მიხედვით, თუმცა მცირე ცვლილებით. რაც შეეხება დარბაზს, მისი 1919 და 1920 წლებში გადაღებული ფოტოების მიხედვით აღდგენა გადაწყდა. ასევე, გამოყენებულია საქართველოს დემოკრატიული რესპუბლიკის სახელმწიფო ნიშნები – დროშა და გერბი.
დამოუკიდებლობის აქტის გამოცხადების ღონისძიებას მაღალი რანგის სტუმრები და ისტორიული დიასპორის წარმომადგენლები დაესწრნენ.