ბიძინა ივანიშვილის დენდროლოგიურ პარკში გადასარგავად ზუგდიდიდან წუხელ კიდევ ერთი ხე გადაიტანეს. აღმაშენებლის გამზირზე მოძრაობა, ისევე როგორც 2 დღის წინ, წუხელაც პარალიზებული იყო.ელ.ენერგია ქალაქსა და 14 სოფელში დაახლოებით 11 საათზე გამოირთო და ამ დრომდე მხოლოდ ნაწილობრივი აღდგენა მოხდა. ხის ტრანსპორტირებისას დაზიანდა ელექტროგადამცემი ბოძები, საგზაო ნიშნები და ინფრასტრუქტურა. ჩახსნილია შუქნიშნები, დამტვრეულია ტოტები.ამ დრომდე მოძრაობა პარალიზებულია ანაკლია-ზუგდიდის გზაზე, სადაც გაჩერებულია ორივე ხე, რადგან წუხელ მათი ტრანსპორტირების გაგრძელება გაძნელდა. არაგაბარიტული  ტვირთის გადაზიდვა რკინიგზაზე შეუძლებელი გახდა, ამიტომაც ხეები შუა გზაზე გააჩერეს.დენის მიწოდება წუხელ  შეუწყდა საავადმყოფოს, საპატრულო პოლიციასა და ბენზინგასამართ სადგურებს.ბიძინა ივანიშვილს ზუგდიდიდან რამდენიმე ხე მიაქვს, რომელთაც სპეციალურ ბორანზე მოათავსებენ და შეკვეთილში ზღვით გადაიტანენ. ხის ტრანსპორტირების პროცესში ასობით ადამიანია ჩართული.თითოეული ხის გადატანას რამდენიმე კვირა და საკმაოდ დიდი თანხები ჭირდება. ივანიშვილის ახირებული სურვილების დაკმაყოფილებას გარემო, ინფრასტრუქტურა და ადგილობრივების ინტერესები ეწირება.