ფოთში, დღეს ნატო-ს სამხედრო საზღვაო ჯგუფში (SNMG2) შემავალი 4 ქვეყნის – ბულგარეთის, რუმინეთის, თურქეთისა და დიდი ბრიტანეთის გემები შევლენ. ქალაქს 1200-მდე სამხედრო პირი ეწვევა. მათი ვიზიტის ფარგლებში სხვადასხვა ღონისძიებაა დაგეგმილი.

 

ფოთის მერის მოადგილის, გიორგი ფარეშიშვილის ინფორმაციით, გემების კაპიტნები სამეგრელო -ზემო სვანეთის გუბერნატორსა და ადგილობრივი ხელისუფლების წარმომადგენლებს შეხვდებიან.

 

მისივე თქმით, 4 დღის მანძილზე გაიმართება კულტურული და სპორტული ღონისძიებები, მოეწყობა ალკოჰოლური კომპანიების მიერ წარმოდგენილი სასმელებისა და ხელნაკეთი ნივთების გამოფენა-გაყიდვა. ჩამოსული სტუმრები დაათვალიერებენ შუქურას, საკათედრო ტაძარს და კოლხური კულტურის მუზეუმს.

 

„მათი ვიზიტი კიდევ ერთხელ იქნება დადასტურება ნატოს მხრიდან საქართველოსთვის, როგორც ერთგული პარტნიორის, როგორც აქტიური მხარდამჭერის და უსაფრთხოების გარანტის. სასიხარულოა , რომ ეს ყველაფერი ფოთის ტერიტორიაზე ხდება,“ – აღნიშნა გიორგი ფარეშიშვილმა. ღონისძიებები შსს-ს და შსს-ს სასაზღვრო პოლიციის ორგანიზებით ეწყობა. 

 

NATO-ს სამხედრო გემები საქართველოს ტერიტორიულ წყლებს 17 მაისს დატოვებენ..