სვანეთში ჰესების "მესტია ჭალა -1" და მესტია ჭალა-2"-ის მშენებლობა განახლებiის გადაწყვეტილებას ადგილობრივი მოსახლეობის ერთი ნაწილის აღშფოთება მოყვა. . სამოქალაქო მოძრაობის წევრები, რომლებიც რამდენიმე თვეა, მესტიაში ჰესების მშენებლობას აპროტესტებენ, აცხადებენ, რომ შსს-ში შემდგარი შეხვედრის შესახებ არაფერი იცოდნენ და, შესაბამისად, თანხმობა, რომელიც იქ ადგილობრივი მოსახლეობის სახელით იქნა გაცხადებული, არ შეესაბამებას ჰესების მშენებლობის მოწინააღმდეგეთა პოზიიციას..
მოსახლეობის ამ ნაწილს აქვს სავსებით ლეგიტიმური კითხვები იმასთან დაკავშირებით, თუ რატომ შედგა ეს შეხვედრა შინაგან საქმეთა სამინისტროში, რომელსაც წესით არანაირი კავშირი არა აქვს სვანეთში ჰესების მშენებლობასთან. მოსახლეობაში ამას ხსნიან იმით, რომ ეს არის ერთგვარი მუქარანარევი მინიშნება იმაზე, რა პრობლემები შეიძლება შეექმას მათ, ვინც პოზიციის დათმობას არ აპირებს.
„სვანეთის ახალგაზრდული მოძრაობის“ წარმოადგენელი ნათელა ქურდიანი ამბობს, რომ ის თანამოაზრეებთან ერთად "მესტია ჭალა -1" და მესტია ჭალა-2"-ის მშენებლობის განახლებას გამონაკლისის სახით დათანხმდა, რადგან ეს შექმნილი ვითარებიდან ერთადერთი გამოსავალი იყო, რაც შეეხება სხვა ჰესების მშენებლობას, მოძრაობა კვლავაც კატეგორიულ წინააღმდეგობას გაუწევს ამას.
„არსებული ვითარების გათვალისწინებით, მთავრობამ კანონპროექტში შეიტანა ცვლილება, რაც გულისხმობს, რომ არცერთი პროექტი და ჰიდროელექტროსადგური მთავრობასა და ადგილობრივ მოსახლეობას შორის მჭიდრო კომუნიკაციისა და ხალხის თანხმობის გარეშე არ აშენდება. კონკრეტულად, მესტიაჭალა ჰესის სამშენებლო პროექტთან დაკავშირებით ჩართული იქნებიან ხალხის ნდობით აღჭურვილი სპეციალისტები, რომელთა არგუმენტირებული შენიშვნები იქნება გათვალისწინებული. მესამე: მოგეხსენებათ, რომ აღნიშნულმა კომპანიამ ადგილობრივ ბიუჯეტში უნდა შეიტანოს გარკვეული ოდენობის თანხა. ჩვენ მოვითხოვეთ, შეიქმნას ზემო სვანეთის განვითარების ფონდი, სადაც კომპანია დამატებით ყოველწლიურად შეიტანს სოლიდურ თანხას, რომლის მიზნობრიობასა თავად განკარგავს ადგილობრივი მოსახლეობა. სამწუხაროა, როდესაც პიროვნებები ავრცელებენ სიცრუეს, თითქოს ისინი ინფორმირებულნი არ იყვნენ ამ შეხვედრის შესახებ. გაუგებარია რა მიზანს ემსახურება მათი ქმედება. ეს ნაბიჯი იყო ბეწვის ხიდზე გავლა, მაგრამ ჩვენი აზრით, არსებული ვითარებიდან ერთადერთი გამოსავალი“, – აღნიშნულია განცხადებაში, რომელსაც ,,სვანეთის ახალგაზრდული მოძრაობა'' ფეისბუქგვერდზე აქვეყნებს.