ბიძინა ივანიშვილის დენდროლოგიური პარკისთვის ასწლოვანი ჭადრის ტრანსპორტირებისას დაზიანებული საგზაო ნიშნები, ელექტრობოძები და ტრაფარეტები დღესაც იმ მდგომარეობაში დაგვხვდა, როგორც წუხელ დატოვეს. ადგილობრივები ამბობენ, ყოფილი პრემიერის ახირებულ სურვილებს მოსახლეობის ინტერესები ეწირება,მათი თქმით, ელ.ენერგია წუხელ 11 საათზე გამორთეს და მხოლოდ დღეს, 2 საათზე ჩაირთო.
დაზიანებული საგზაო ნიშნებისა და ბოძების გასწორება დღეს არავის უცდია და არც ის იციან, როდის დაიწყებენ აღდგენით სამუშაოებს.დიდინეძი-ორულუსა და ერგეტას გზაზე წუხელ ბიძინა ივანიშვილის ასწლოვანი ჭადრის ტრანსპორტირების გამო მოძრაობა პარალიზებული იყო. ივანიშვილის დენდროლოგიურ პარკში გადასარგავად დიდინეძში ხის ამოღების სამუშაოები კომპანია „ზიმომ“ იანვარში დაიწყო. ჭადარი, რომელიც შეკვეთილში გადასარგავადაა გამზადებული, ყოფილი კოოპერატივის ტერიტორიაზე, სოფლის ცენტრში იდგა.
ორი შენობიდან, სამუშაოების გამო ერთი დანგრეულია. ტერიტორია ეკონომიკის სამინისტროს ბალანსზე ირიცხებოდა, თუმცა სამინისტრომ ის ხის ამოღების სამუშაოების დაწყებამდე ცოტა ხნით ადრე გაასხვისა. ჭადრის ხემ წუხელ დიდინეძიდან ერგეტამდე გადაინაცვლა და ის ამჟამად სოფელ ერგეტის შესასვლელშია გაჩერებული. ბიძინა ივანიშვილის სურვილების დასაკმაყოფილებლად ზუგდიდიდან კიდევ რამდენიმე ხის გადატანა იგეგმება.
ხეებს ანაკლიიდან ბარჟით შეკვეთილში გადაიტანენ. ადგილობრივები აბობენ, რომ დიდინეძიდან ყოფილმა პრემიერმა ჯერ-ჯერობით მხოლოდ ერთი ხე წაიღო, თუმცა მისი ტრანსპორტირებისას ცენტრალურ ქუჩაზე ხეების ტოტები დაიმტვრა და საგზაო ინფრასტრუქტურა დაზიანდა. ადგილობრივების თქმით, ოლიგარქის ხეს სოფლის ცენტრი და ქუჩა შეეწირა, რომელიც დღეს დანგრეული და გაჩანაგებულია, გამკითხავი არავინ ჩანს.