სოხუმის მთავარი საათის კოშკს კაპიტალური რემონტი ჩაუტარდება – ეს გადაწყვეტილება ოკუპირებული ქალაქის ადმინისტრაციამ მიიღო.
როგორც აფხაზური მედია იუწყება, ახალი კოშკი ამჟამად არსებულის ზუსტი ასლი იქნება, უბრალოდ მისი ხის კონსტრუქციები მეტალით შეიცვლება. ამჟამად მეტალის კონსტრუქციების დამზადება მიმდინარეობს, როგორც კი ეს სამუშაოები დასრულდება, არსებულ კოშკს დაშლიან. მეტალის კარკასი , რომელიც სიმაღლით 14 მეტრზემეტია ორ ეტაპად დამონტაჟდება სპეციალური ტექნიკით.
სპეციალისტებმა ეს გადაწყვეტილება კონსტრუქციის დეტალური შესწავლის შემდეგ მიიღეს. სათის მექანიზმი ორ ტონაზე მეტს იწონის, ასეთ დატვირთვას მოძველებული ხის საყრდენები ვეღარ უძლებს და ნაგებობამ გადახრა იწყო, რაც საათის მუშაობაზეც აისახა, იგი კარგა ხანია სწორ დროს ვერ უჩვენებს.
სოხუმი რომ კოშკიანად აცდა დროს, არავისთვის, მათ შორის თავად აფხაზებისთვისაც არ არის უცნობი. საათს ასე თუ ისე გაასწორებენ, მაგრამ ეს არ არის საკმარისი. აფხაზეთი დროსა და რეალობას უნდა დაუბრუნდეს, ვინძლო ამ საათის გონგმა დრო უკუღმა არ დაითვალოს და მათგან არავინ დარჩეს დამსმელი შეკითხვისა ,,ვის უხმობს ზარი?'' თუ სოხუმში დღეს არსებულ ვითარებას ( ოკუპანტების მხრიდან აფხაზების სრული ასიმილაციის პოლიტიკას, ეკონომიკურ კრიზისს, კრიმინალის თარეშს და, რაც მთავარია , გეომეტრიული პროგრესიით მზარდ დემოგრაფიულ დისბალანსს გავითვალისწინებთ, დრო აფხაზების წინააღმდეგ მუშაობს – საათის რემონტი ამ საქმეს ვერ უშველის, სანამ ისინი დროს მოსკოვზე ასწორებენ.