მიხეილ სააკაშვილი „საქართველოს ბანკისა“ და „თიბისი ბანკის“ დირექტორებს გასულ წელს აღებული ხელფასის გამო აკრიტიკებს. როგორც მიხეილ სააკაშვილმა „ფეისბუქის“ საკუთარ გვერდზე ვიდეომიმართვაში განაცხადა, აღნიშნული ბანკების დირექტორებმა გასულ წელს 9 მილიონ დოლარამდე ხელფასი გამოიწერეს, „რაც არის ნამდვილი გაღორება“, რადგან ბანკების მოგების ხარჯზე საქართველოს ეკონომიკა ნადგურდება. 

 

„მინდა დავუბრუნდე ბანკების თემას, თქვენ იცით, რომ იმ ზემოგებების ხარჯზე, რომელიც აქვთ ბანკებს, პრაქტიკულად, საქართველოს ეკონომიკა ნადგურდება. ახლა ვნახე ციფრები. „საქართველოს ბანკის“ დირექტორს გილაურს და „თიბისი ბანკის“ დირექტორს ბუცხრიკიძეს ერთად 9 მილიონ დოლარზე მეტი ხელფასი აქვთ აღებული. ეტყობა მე რაღაცას ვერ ვხვდები. ჩვენ ყველას გვაქვს მიღებული რაღაც განათლება. თქვენს უმეტესობას აქვს ბევრად მეტი დამსახურება საქართველოს წინაშე, ვიდრე ამ ორ სუბიექტს. რის ხარჯზე გამოიწერეს ამხელა მოგება, ამხელა ხელფასი? ეს ხომ არის ნამდვილი გაღორება იმის ხარჯზე, რომ ხალხმა დაკარგა ბიზნესები, სახლები, მანქანები, საბანკო ანგარიშები დაუხურეს, ვერ იხდის სწავლის გადასახადს. ყოველ მეორე პენსიონერს აქვს ბანკის ვალი. ახალგაზრდები მასობრივად გაედინებიან ქვეყნიდან და თითოეული იწერს უფრო მეტ შემოსავალს, ვიდრე იღებს 13 000 ქართველი პენისონერი ერთად აღებული. ეს არის დიდი უსამართლობა. ამიტომ, ჩვენ ამ სფეროში უნდა დავამყაროთ მკაცრი წესრიგი. პირველ რიგში, უნდა აიკრძალოს არაპროფილურ ბიზნესებში ბანკების შესვლა. ახლა სადმე რაღაც მოგება რომ გაფაჩუნდება – თვითონ აქვთ მთელი ინფორმაცია კლიენტებზე, შედიან ამ კლიენტებთან და ახრჩობენ მათ – ხურავენ მათ წარმოებას, ანადგურობენ მათ ფერმებს, უსპობენ პერსპექტივას, რათა თავისთვის მიიღონ ზემოგება და კიდევ უფრო მეტი ფული ჩაიდონ ამ მევახშეებმა ჯიბეში“, – განაცხადა მიხეილ სააკაშვილმა. 

ყოფილი პრეზიდენტის განცხადებით, მაისის დასაწყისიდან, „ნაციონალური მოძრაობა“ დაიწყებს „უსამართლო ვალების“ აღრიცხვას და ხელისუფლების შეცვლისთანავე შეიქმნება „საკრიზისო ფონდი“, რომელიც ასეთი ვალების მიმართ ორწლიან მორატორიუმს გამოაცხადებს.