,,როდესაც ადამიანი დასმული კითხვების გამო ფილარმონიიდან გარბის, რა უნდა ვქნათ, საზოგადოებასაც ავუკრძალოთ კითხვების დასმა?! ქაღალდზე დაწერილი ქცევის წესები მე არ მჭირდება, „რაღაც ქაღალდებით გამაგრება სუსტ ადამიანებს სჭირდებათ“. – ამის შესახებ ჟურნალისტებთან საუბრისას „ქართული ოცნების“ დეპუტატმა დავით ჭიჭინაძემ განაცხადა.
„თუკი ჩვენი ქცევა ჩვენი ამომრჩევლის ინტერესებს ეწინააღმდეგება, ვერავითარი საბუთი ვერ დამაკავებს, რომ ამ წესებს დავემორჩილო. თუკი ეს იქნება ჩვენი ამომრჩევლისა და მოქალაქეების ინტერესებში, ყოველგვარი დოკუმენტის გარეშე ვემორჩილები. რაღაც ქაღალდებით გამყარება სუსტ ადამიანებს სჭირდებათ. ადამიანს გააჩნია სიტყვა, შინაგანი ენერგია და ამით უნდა იხელმძღვანელოს. როდესაც ადამიანი დასმული კითხვების გამო ფილარმონიიდან გარბის, რა უნდა ვქნათ, საზოგადოებასაც ავუკრძალოთ კითხვების დასმა?! ქაღალდზე დაწერილი ქცევის წესები მე არ მჭირდება“, – განუცხადა ჟურნალისტებს დავით ჭიჭინაძემ.
როგორც ცნობილია, „ქართული ოცნება“ შიდა დოკუმენტის მიღებას აპირებს, რომლითაც, როგორც დეპუტატები განმარტავენ, ურთიერთობებისა და გადაწყვეტილებების მიღების ფორმა განისაზღვრება. დოკუმენტი პარალამენტის თავმჯდომარემ ირაკლი კობახიძემ უნდა მოამზადოს, სწორედ ირაკლი კობახიძეა ფილარმონიიდან გაქცეული კაცი, ვისზეც ჭიჭინაძე საუბრობს.
შეგახსენებთ შარშან 15 მაისს კონსტიტუციის საყოველთაო-სახალხო განხილვა, რომელიც თბილისში, ფილარმონიის დიდ საკონცერტო დარბაზში მიმდინარეობდა, ჩაიშალა. შეხვედრის წამყვანის, ფრაქცია„ქართული ოცნების“ თავმჯდომარის, მამუკა მდინარაძის თქმით, შეხვედრა ჩაიშალა წინასწარ დაგეგმილი პროვოკაციის გამო. მოქალაქეების ნაწილმა პარლამენტის თავმჯდომარესა და კონსტიტუციის საყოველთაო-სახალხო განხილვაში ჩართულ პოლიტიკოსებს არ მისცა სიტყვით გამოსვლის საშუალება. სინამდვილეში, კობახიძეს არ ჰქონდა პასუხი იქ დასმულ კითხვებზე და გაქცევა ამჯობინა.
როგორც პარლამენტის თავმჯდომარე ირაკლი კობახიძემ განაცხადა, დარბაზში განვითარებული მოვლენების ფონზე, ის ვერ ხედავს შეხვედრის გაგრძელების აზრს.