დღეს, 13 აპრილს მუხიანში მკვლელობა მოხდა.
შინაგან საქმეთა სამინისტროში შემოვიდა შეტყობინება, რომ მუხიანში, ერთ-ერთ საცხოვრებელ კორპუსთან ნანახი იქნა დაჭრილი ახალგაზრდა მამაკაცი. პოლიცია შემთხვევის ადგილზე უმოკლეს დროში გამოცხადდა. მამაკაცს ქვედა კიდურებზე ცეცხლნასროლი ჭრილობები აღენიშნებოდა. დაჭრილი სასწრაფო სამედიცინო დახმარების ბრიგადამ კლინიკაში გადაიყვანა, თუმცა, მიყენებული ჭრილობების შედეგად, იგი საავადმყოფოში გარდაიცვალამუხიანში მომხდარი მკვლელობის მოტივი ამ დრომდე უცნობია. 26 წლის მამაკაცის ცხედარი ექსპერტიზის ბიუროდან საცხოვრებელ სახლში ცოტა ხნის წინ გადაასვენეს.
მკვლელობის მოტივზე ინფორმაციას არ ავრცელებს არც შს სამინისტრო. ადგილობრივების თქმით, მოკლული მამაკაცი და სავარაუდო დამნაშავე ნათესავები არიან.
მეზობლები ამბობენ, რომ მოკლული მამაკაცი დის ქმარმა საქმის გარკვევის მიზნით, საცხოვრებელი სახლიდან გაიყვანა და დაპირისპირება მუხიანში ერთ-ერთი საჯარო სკოლის ეზოში მოხდა.
მკვლელობაში ეჭვმიტანილი სამართალდამცველებმა წითელ ხიდთან, საზღვრის დატოვების მცდელობისას დააკავეს.
გამოძიება საქართველოს სისხლის სამართლის კოდექსის 117-ე მუხლით მიმდინარეობს, რაც გულისხმობს ჯანმრთელობის განზრახ მძიმე დაზიანებას, რამაც ადამიანის სიცოცხლის მოსპობა გამოიწვია
.