საქართველოს პრეზიდენტი გიორგი მარგველაშვილი აზერბაიჯანის საპრეზიდენტო არჩევნებში ილჰამ ალიევს გამარჯვებას ულოცავს.
„გულითადად ვულოცავ ჩემს მეგობარს, ბატონ ილჰამ ალიევს აზერბაიჯანის რესპუბლიკის პრეზიდენტად ხელახლა არჩევას. მტკიცედ მწამს, რომ საქართველოსა და აზერბაიჯანის რესპუბლიკას შორის მრავალი საუკუნის განმავლობაში ჩამოყალიბებული მეგობრული ურთიერთობები კვლავაც განვითარდება ჩვენი ხალხების საკეთილდღეოდ. ვუსურვებ ბატონ პრეზიდენტს წარმატებას მის სახელმწიფოებრივ საქმიანობაში აზერბაიჯანელი ხალხის მშვიდობისა და კეთილდღეობისათვის“, – ნათქვამია მილოცვის ტექსტში.
შეგახსენებთ, რომ აზერბაიჯანის ცენტრალური საარჩევნო კომისიის თავმჯდომარის მაზაჰირ პანახოვის განცხადებით, ბიულეტენების 65%-ის დამუშავების შემდეგ ილჰამ ალიევმა არჩევნებში მონაწილეთა ხმების 86,09%-ს მიიღო.
ილჰამ ალიევმა, რომელიც აზერბაიჯანის საპრეზიდენტო არჩევნებში იმარჯვებს, ქვეყნის მოსახლეობას მხარდაჭერისთვის მადლობა გადაუხადა.
„ყოველთვის ვგრძნობდი ხალხის მხარდაჭერას. ის ძალიან მნიშვნელოვანი პირობაა ჩვენი განვითარებისთვის“, – განაცხადა ალიევმა. მან ასევე აღნიშნა, რომ აზერბაიჯანის მოსახლეობამ ხმა „უსაფრთხოებას, პროგრესს და განვითარებას მისცა“.
„თქვენი მხარდაჭერა არის იმ სამუშაოს შეფასება, რაც ჩვენ ბოლო 15 წლის მანძილზე გავწიეთ. 15 წლის მანძილზე აზერბაიჯანის ეკონომიკა 3,2-ჯერ გაიზარდა. თუმცა ჩვენ კიდევ უფრო ძლიერები უნდა ვიყოთ. წინ, ახალი გამარჯვებებისკენ!“ – განაცხადა ალიევმა.