აქციის მონაწილეებმა, რომლებიც მესტიაში ჰესების მშენებლობას აპროტესტებენ, ცემენტით დატვირთული სპეციალური ტექნიკა გაატარეს.
ეს გადაწყვეტილება მათ მესტიაში ჩასულ შს მინისტრის მოადგილესთან კახაბერ საბანაძესთან შეხვედრის შემდეგ მიიღეს. აქციის ერთერთი ორგანიზატორი ნათია ქურდიანი აცახადებს, რომ შეთანხმება შედგა, ცემენტს შეიტანენ, თუმცა სამუშაოები მანამ შეჩერდება, ვიდრე ჰესების მშენებელი კომპანია და ადგილობრივი მოსახლეობა შეთანხმებას არ მიაღწევს.
"არ გაგრძელდება არანაირი სამუშაო, ვიდრე ჩვენ და კომპანია არ შევთანხმდებით. ყველანაირი სამუშაოს წამოწყება ჩაითვლება მიზანმიმართულ პროვოკაციად. 24 – საათიან რეჟიმში ამ პროცესებს გააკონტროლებს მობილური ჯგუფი", – აღნიშნა ნათია ქურდიანმა.
შს მინისტრის მოადგილე მესტიის მოსახლეობას უკვე მეორედ შეხვდა.
შეგახსენებთ, მესტიაში ადგილობრივებმა პროტესტის ნიშნად გზა გადაკეტეს და ორი დღის განმავლობაში სპეციალური ტექნიკა, რომელიც ცემენტით არის დატვირთული, მშენებარე ჰესის ტერიტორიაზე არ შეუშვეს.