მიწათსარგებლობის გენერალურ გეგმასა და მასთან დაკავშირებულ საკითხებზე დღეს საკანონმდებლო ორგანოში იმსჯელებენ.თბილისის მერს პარლამენტში ელოდებიან. მერიაში განმარტავენ, რომ გენგეგმასთან დაკავშირებით შეფასებასა და შენიშვნებს წარადგენენ. კალაძის მოადგილე აცხადებს, რომ პროექტში არსებობს ხარვეზები და არის კითხვები, რომელთაც პოლიტიკოსებთან ერთად განიხილავენ.ილია ელოშვილის თქმით, დედაქალაქის გენგეგმის არსებული პროექტი არ არის ისეთი ნამუშევარი, როგორიც თბილისს ეკადრება. შეხვედრა პარლამენტში 14:00 საათზე დაიწყება.გენგეგმაზე თბილისის მერსა და მერობის ყოფილ კანდიდატებს შორის დაპირისპირება მოხდა.თბილისის განვითარების გენერალური გეგმის პროექტი, რომელიც 2030 წლამდეა გაწერილი, თბილისის მერიას 3 იანვარს ჩაჰბარდა.გენგეგმაზე მუშაობა 2015 წელს დაიწყო და დოკუმენტის შესაქმნელად 2 800 000 ლარი გამოიყო. მიწათსარგებლობის გენერალური გეგმის 5 ეტაპი უკვე მიღებული და დამტკიცებულია, მე-6 საბოლოო ეტაპზე მერიამ ჯგუფი ერთი და იმავე შენიშვნის სამჯერ გაუთვალისწინებლობისთვის გასული წლის დეკემბერში 140 ათასი ლარით დააჯარიმა და შენიშვნების გამოსასწორებლად 45-დღიანი ვადა მისცა, რომელიც თებერვლის ბოლოს ამოიწურა.