ვლადიმერ პუტინისთვის რუსეთის პრეზიდენტად მეოთხე ვადით არჩევა დასავლელ ლიდერებს ამ დრომდე არ მიულოცავთ.

 

რაც შეეხება მსოფლიოს სხვა ქვეყნებს, რუსეთის პრეზიდენტს  მიულოცეს ჩინეთის სახალხო რესპუბლიკის თავმჯდომარე სი ძინპინმა,  ბოლივიის პრეზიდენტმა ევო მორალესმა, ვენესუელას პრეზიდენტმა ნიკოლას მადურომ, კუბის ლიდერმა რაულ კასტრომ, ეგვიპტის პრეზიდენტმა აბდელ ფათაჰ ალ-სისიმ.

პუტინმა მილოცვები მიიღო აგრეთვე  პოსტსაბჭოური სივრცის  რამდენიმე ქვეყნის ლიდერებისგან , მათ შორის სომხეთის, აზერბაიჯანის, ბელარუსის, ყაზახეთის, პრეზიდენტებისგან. 

 

„ეს გამარჯვება მეტყველებს თქვენს მაღალ პოლიტიკურ ავტორიტეტზე და თქვენს მიერ გატარებული კურსის აქტიურ მხარდაჭერაზე“, – წერია მისალოც ტექსტში, რომელიც აზერბაიჯანის პრეზიდენტის ილჰამ ალიევის ოფიციალურ ვებგვერდზე გამოქვეყნდა. 

 

რუსეთის საპრეზიდენტო არჩევნებში ვლადიმერ პუტინმა ხმების 76,66 % მიიღო (56 მილიონზე მეტი) რუსული მედიის ცნობით, ცენტრალურმა საარჩევნო კომისიამ ბიულეტენების 99,84 % უკვე დაამუშავა.

 

რუსეთში საპრეზიდენტო არჩევნები გუშინ ჩატარდა. ამომრჩევლების აქტივობამ 67 % შეადგინა.