ქართველ მეზღვაურს ნუკრი ხოხბას, რომელიც გუშინ გაათავისუფლეს ლიბიის ციხიდან, ბათუმის საზღვაო ტრანსპორტის სააგენტოსა და აჭარის მთავრობის წარმომადგენლები ხვდებიან.
როგორც ნუკრი ხოხბამ ჟურნალისტებთან საუბრისას განაცხადა, ლიბიის ციხეში კიდევ ორი ქართველი მეზღვაური რჩება, ისინი საქართველოს ოფიციალური უწყებებიდან წარმომადგებლებს ელოდებიან, ვინაიდან მათი გათავისუფლების პროცესი ჭიანურდება.
ნუკრი ხოხბას ინფორმაციით, ციხეში საკვებსა და წყალთან დაკავშირებით პრობლემები იყო, თუმცა ძალადობის ფაქტი არ ყოფილა.
როგორც საქართველოს საგარეო საქმეთა სამინისტროს წარმომადგენელი ვლადიმერ კონსტანტინიდი აცხადებს, ლიბიაში სიტუაციის გასაცნობად უწყების წარმომადგენელი უახლოეს მომავალში ვიზიტს გეგმავს. მისივე თქმით, ლიბიის ციხეში მყოფი ქართველი მეზღვაურების გასათავისუფლად მუშაობა ინტენსიურად მიმდინარეობს. როგორც ვლადიმერ კონსტანტინიდმა აღნიშნა, ლიბიაში გასამგზავრებლად უწყებაში ვიზებს ელოდებიან.
2017 წლის აგვისტოში ლიბიაში ქართველი მეზღვაურები დააკავეს. მათ საზღვაო კანონმდებლობის დარღვევა ედებათ ბრალად, თუმცა ნუკრი ხოხბა აცხადებს, რომ მისთვის უცნობია სახელდობრ რატომ დააკავეს ლიბიაში.