ცხინვალის საოკუპაციო რეჟიმის მიერ 22 თებერვალს არჩილ ტატუნაშვილთან ერთად დაკავებული საქართველოს ორი მოქალაქე თავისუფალია. მათ ოკუპირებული ახალგორი გუშინ საღამოს დატოვეს.გვიან ღამით დასრულდა მათი დაკითხვა მცხეთის სამხარეო პოლიციაში.ლევან ქუტაშვილმა და იოსებ პავლიაშვილმა პოლიციიდან გამოსვლის შემდეგ მედიასთან კომენტარი არ გააკეთეს.დაკითხვის დროს პოლიციაში მათთან ერთად იმყოფებოდნენ სახელმწიფო უსაფრთხოების სამსახურის საინფორმაციო ანალიტიკური დეპარტამენტის დირექტორის მოადგილე კახაბერ ქემოკლიძე და მცხეთის მაჟორიტარი დეპუტატი დიმიტრი ხუნდაძე. მედიასთან დამატებითი დეტალების შესახებ არც მათ უსაუბრიათ.მანამდე გათავისუფლებულებს მინისტრთა კაბინეტის წარმომადგენლები შეხვდნენ.საქმეზე გამოძიება განზრახ მკვლელობისა და თავისუფლების უკანონო აღკვეთის მუხლებით მიმდინარეობს. გათავისუფლებულების ოფიციალური დაკითხვა მომდევნო დღეებში იგეგმება.„გამოძიება მიმდინარეობს 108-ე და 143-ე მუხლის საფუძველზე. ეს გულისხმობს განზრახ მკვლელობასა და თავისუფლების უკანონო აღკვეთას. როგორც მოგეხსენებათ, ლევან ქუტაშვილი და იოსებ პავლიაშვილი გადმოყვანილი არიან საქართველოს ცენტრალური ხელისუფლების მიერ კონტროლირებად ტერიტორიაზე. მიდის საგამოძიებო მოქმედებები და ჯერჯერობით თავს შევიკავებ კონკრეტიკისგან,“-განაცხადა საქართველოს შინაგან საქმეთა მინისტრის პირველი მოადგილე კახაბერ საბანაძემ.