თემირლან მაჩალიკაშვილის ცხედრის ექსპერტიზის საბოლოო დასკვნა დღეს გახდება ცნობილი. ტექსტის საბოლოო ვერსიას, სამხარაულის ექსპერტიზის ბიუროში მაჩალიკაშვილების ოჯახის ადვოკატის მიერ მოწვეული დამოუკიდებელი ექსპერტი მაია ნიკოლეიშვილი დღის მეორე ნახევარში გაეცნობა. როგორც დამოუკიდებელი ექსპერტი აღნიშნავს, რა მდგომარეობაში იმყოფებოდა სროლის მომენტში თემირლან მაჩალიკაშვილი, ამის დასადგენად კვლევა აღნიშნული სასამართლო-სამედიცინო ექსპერტიზის საბოლოო დასკვნის შემდეგ უნდა ჩატარდეს.
„მე თავიდანვე ვთქვი, რომ ცოტა შემაღლებულ ბალიშზე ედო თავი სროლის დროს. მისი მდგომარეობა იყო მწოლიარე. თუმცა მისი მდგომარეობის დადგენა უნდა მოხდეს, ამ დასკვნის დადების შემდეგ. სასამართლო-სამედიცინო ექსპერტიზის ჩატარებამდე არავითარი სხვა კვლევა არ უნდა ჩატარდეს“, – აღნიშნა სასამართლო-სამედიცინო ექსპერტმა.