,,ყოველ წუთს ველოდებით, რომ მოხდება ცხედრის გადაცემა ოჯახისთვის'' – განაცხადა საქართველოში გაერო-ს განვითარების პროგრამის მუდმივმა წარმომადგენელმა ნილ სკოტმა ოკუპირებულ ტერიტორიაზე მოკლული არჩილ ტატუნაშვილის ცხედრის საქართველოში გადმოსვენების საკითხთან დაკავშირებით.
“როგორც ვიცით, ძალიან ინტენსიური მუშაობა მიმდინარეობს და ყოველ წუთს ველოდებით იმას, რომ მოხდება ცხედრის გადაცემა ოჯახისთვის. ასევე ველოდებით ორი დაკავებული ადამიანის გათავისუფლებას. ზუსტ თარიღებზე ჩვენ ვერ ვსაუბრობთ იმიტომ, რომ ზუსტი თარიღები არ ვიცით, მაგრამ ვიცით, რომ ძალიან ინტენსიური სამუშაოები მიმდინარეობს”, – განაცხადამან. ნილ სკოტმა.
სხვა მოსაზრება აქვს საქართველოს შინაგან საქმეთა მინისტრს გიორგი გახარიას – ,, არჩილ ტატუნაშვილის ცხედრის გადმოსვენებასთან დაკავშირებით დამატებითი მოლოდინების შექმნა და წუთების თვლა არ არის სწორი, – თუმცა, რა თქმა უნდა, ჩვენ იმედი გვაქვს, რომ ეს ტრაგიკული პრობლემა გადაწყდება გონივრულ ვადებში და ამისთვის მაქსიმუმს გავაკეთებთ. ''
რაც შეეხება ცხინვალის რეჟიმის მიერ დაკავებულ მოქალაქეებს, გახარიას თქმით, ზუსტად იგივე რეჟიმში და მსგავსი ძალისხმევით მიმდინარეობს მუშაობა მათი უსაფრთხოებისთვის ზომების მისაღებად და საქართველოს მიერ კონტროლირებად ტერიტორიაზე გადმოსაყვანად.
“მომხდარზე მიმდინარეობს გამოძიება, საქმე არის აღძრული. უპირველესი ამოცანა ჩვენი არის გარდაცვლილ მოქალაქეს მივაგოთ პატივი და კიდევ, უნდა ვიზრუნოთ მოქალაქეების უსაფრთხოებაზე. შემდგომ უნდა ვიმსჯელოთ ყველაფერზე. დღეს კონკრეტულ დღეებზე, საათებსა და წუთებზე საუბარს არ ვთვლი შესაძლებლად“, – აღნიშნა გახარიამ.